ନୂଆଦିଲ୍ଲୀ: ଦେଶରେ ଜଣକ ପରେ ଜଣେ ବିଶିଷ୍ଟ ବ୍ୟକ୍ତି କରୋନା ଭାଇରସରେ ଆକ୍ରାନ୍ତ ହେଉଛନ୍ତି । ଇତିମଧ୍ୟରେ କେନ୍ଦ୍ର ସ୍ୱରାଷ୍ଟ୍ରମନ୍ତ୍ରୀ ଅମିତ୍ ଶାହ, କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ମଧ୍ୟପ୍ରଦେଶ ମୁଖ୍ୟମନ୍ତ୍ରୀ ଶିବରାଜ ସିଂ ଚୌହ୍ୱାନ, ଉତ୍ତରପ୍ରଦେଶର ଜଣେ କ୍ୟାବିନେଟ୍ ମନ୍ତ୍ରୀଙ୍କ ସମେତ ଆହୁରି ବହୁ ତୁଙ୍ଗ ନେତା, ସାଂସଦ, ମନ୍ତ୍ରୀ ଓ ଶିଳ୍ପପତି, ଫିଲ୍ମ ତାରକା ଆଦି ଆକ୍ରାନ୍ତ ହୋଇଛନ୍ତି । ଏହି ତାଲିକାରେ ଏବେ ଆଉଜଣେ ବିଶିଷ୍ଟ ବ୍ୟକ୍ତି ଯୋଡ଼ି ହୋଇଛନ୍ତି । ସେ ହେଉଛନ୍ତି ଭାରତର ପୂର୍ବତନ ରାଷ୍ଟ୍ରପତି ପ୍ରଣବ ମୁଖାର୍ଜୀ । ପ୍ରଣବ କରୋନା ଭାଇରସରେ ଆକ୍ରାନ୍ତ ହୋଇଛନ୍ତି । ସେ ନିଜେ ଟ୍ୱିଟ୍ କରି ଏହି ସୂଚନା ଦେଇଛନ୍ତି । ଆଜି ତାଙ୍କର ସ୍ୱାବ ନମୁନା ରିପୋର୍ଟ ପଜିଟିଭ୍ ଆସିବା ପରେ ସେ ଟ୍ୱିଟ୍ କରିଥିଲେ । ସେ କହିଛନ୍ତି ଯେ, ଅନ୍ୟ କାମ ପାଇଁ ଡାକ୍ତରଖାନା ଗସ୍ତରେ ଆସିଥିବା ବେଳେ ମୋର ରିପୋର୍ଟ ପଜିଟିଭ୍ ଆସିଥିବା ଜାଣିବାକୁ ପାଇଲି । ଗତ ସପ୍ତାହରେ ମୋ ସହ ଯୋଗାଯୋଗରେ ଆସିଥିବା ବ୍ୟକ୍ତିମାନେ ପରୀକ୍ଷା କରାଇନେବା ଉଚିତ୍ ବୋଲି ସେ ପରାମର୍ଶ ଦେଇଛନ୍ତି । ବର୍ତ୍ତମାନ ସମୟରେ ଲୋକେ ନିଜ ଆଡୁ ଜଣାଇବା ଅତ୍ୟନ୍ତ ଗୁରୁତ୍ୱପୂର୍ଣ୍ଣ ।
