ନୂଆଦିଲ୍ଲୀ: ଦିନିକିଆ ଓ ଟି-୨୦ ସିରିଜ ଖେଳିବା ପାଇଁ ଇତିମଧ୍ୟରେ ୱେଷ୍ଟଇଣ୍ଡିଜରେ ପହଞ୍ଚିଛି ଭାରତୀୟ ଦଳ । ଦୁଇ ଦଳ ତିନୋଟି ଦିନିକିଆ ଏବଂ ପାଞ୍ଚଟି ଟି-୨୦ ମ୍ୟାଚ ଖେଳିବେ । ଶିଖର ଧାୱନଙ୍କ ନେତୃତ୍ୱାଧୀନ ଦିନିକିଆ ଦଳ ଏକ ସ୍ୱତନ୍ତ୍ର ଚାର୍ଟର୍ଡ ବିମାନରେ ୱେଷ୍ଟଇଣ୍ଡିଜରେ ପହଞ୍ଚିଛନ୍ତି । ବିସିସିଆଇ ପକ୍ଷରୁ ଏକ ନେଇ ସ୍ୱତନ୍ତ୍ର ବ୍ୟବସ୍ଥା କରାଯାଇଥିଲା । ଦଳ ସୋମବାର ମାଞ୍ଚେଷ୍ଟରରୁ ଇଣ୍ଡିଜ ଅଭିମୁଖେ ଯାତ୍ରା କରିଥଲା । ଦିନିକିଆ ସିରିଜରୁ ବିଶ୍ରାମ ନେଇଥିବା ଅଧିନାୟକ ରୋହିତ ଶର୍ମାଙ୍କ ସମେତ ଅନ୍ୟ ଖେଳାଳି ପରେ ୱେଷ୍ଟଇଣ୍ଡିଜରେ ପହଞ୍ଚିବେ । ୧୬ ଜଣିଆ ଦିନିକିଆ ଦଳରେ ସଞ୍ଜୁ ସାମସନ, ଋତୁରାଜ ଗାଏକୱାଡ ଏବଂ ଶୁଭମାନ ଗିଲ୍ ସାମିଲ୍ । ତିନି ଜଣ ଇଂଲଣ୍ଡ ବିପକ୍ଷ ଦିନିକିଆ ସିରିଜରେ ଦଳରେ ନଥିଲେ । ଭାରତୀୟ ଦଳ ମଙ୍ଗଳବାର ପୋର୍ଟ ଅଫ ସ୍ପେନରେ ତ୍ରିନିଦାନ ଏବଂ ଟୋବାଗୋରେ ଏକତ୍ର ହୋଇଛନ୍ତି । ମୁଖ୍ୟ କୋଚ୍ ରାହୁଲ ଦ୍ରାବିଡଙ୍କ ସହିତ ସହାୟକ କୋଚିଂ ଷ୍ଟାଫ ମଙ୍ଗଳବାର ମାଞ୍ଚେଷ୍ଟରରୁ ୱେଷ୍ଟଇଣ୍ଡିଜ ଅଭିମୁଖେ ଯାତ୍ରା କରିବେ । ଋଷଭ ପନ୍ତ ଏବଂ ରୋହିତ ଶର୍ମା ଜୁଲାଇ ୨୭ ସୁଦ୍ଧା ଦଳରେ ଯୋଗ ଦେବେ ।
