୨୦୨୪ ଟି-୨୦ ବିଶ୍ୱକପ ପୂର୍ବରୁ ଏହି ଖେଳାଳିଙ୍କୁ କରାଯାଉ ଅଧିନାୟକ, କହିଲେ ପୂର୍ବତନ ଜାତୀୟ ଚୟନ କମିଟିର ଅଧ୍ୟକ୍ଷ
ନୂଆଦିଲ୍ଲୀ : ପୂର୍ବତନ ଜାତୀୟ ଚୟନ କମିଟିର ଅଧ୍ୟକ୍ଷ କୃଷ୍ଣମାଚରୀ ଶ୍ରୀକାନ୍ତ କହିଛନ୍ତି ଯେ ୨୦୨୪ ଟି -୨୦ ବିଶ୍ୱକପ ପୂର୍ବରୁ ଅଲରାଉଣ୍ଡର ହାର୍ଦ୍ଦିକ ପାଣ୍ଡ୍ୟାଙ୍କୁ କ୍ଷୁଦ୍ରତମ ଫର୍ମାଟର ପୂର୍ଣ୍ଣକାଳୀନ ଅଧିନାୟକ ଭାବରେ ନିଯୁକ୍ତ କରାଯିବା ଉଚିତ ଏବଂ ଭାରତ ନ୍ୟୁଜିଲ୍ୟାଣ୍ଡ ବିପକ୍ଷ ସୀମିତ ଓଭର ସିରିଜରୁ ଦଳକୁ ପୁନଃ ନିର୍ମାଣ ପ୍ରକ୍ରିୟାରେ ଆରମ୍ଭ କରିବା ଦରକାର । ଶେଷ ହୋଇଥିବା ଟି -୨୦ ବିଶ୍ୱକପ୍ରୁ ଭାରତ ସେମିଫାଇନାଲରୁ ବାଦ ପଡିଥିଲା । ୫ଟି ବିଶ୍ୱକପ୍ରେ ଏହା ହେଉଛି ଭାରତର ପଞ୍ଚମ ନକ୍ଆଉଟ୍ ପରାଜୟ ।
ଷ୍ଟାର୍ ସ୍ପୋର୍ଟସର ଏକ ଇଭେଣ୍ଟରେ ଶ୍ରୀକାନ୍ତ କହିଛନ୍ତି ଯେ ଯଦି ମୁଁ ଚୟନ କମିଟିର ସଭାପତି ଥାଆନ୍ତି, ତେବେ ମୁଁ କହିଥାନ୍ତେ ଯେ ହାର୍ଦ୍ଦିକ ପାଣ୍ଡ୍ୟା ବିଶ୍ୱକପ୍ ୨୦୨୪ ପାଇଁ ଅଧିନାୟକ ହେବା ଉଚିତ୍ । ମୁଁ ତୁରନ୍ତ ଏହି ନିଷ୍ପତ୍ତି ନେଇଥା’ନ୍ତି । ଦଳର ପୁନଃ ନିର୍ମାଣ ପ୍ରକ୍ରିୟା ଆଜିଠାରୁ ଆରମ୍ଭ ହେବା ଉଚିତ୍ । ଏହି କାର୍ଯ୍ୟ ନ୍ୟୁଜିଲ୍ୟାଣ୍ଡ ସିରିଜ୍ ସହିତ ଆରମ୍ଭ ହେବା ଉଚିତ ଯାହା ଏକ ସପ୍ତାହ ମଧ୍ୟରେ ଆରମ୍ଭ ହେବ ।
ଶୁକ୍ରବାର ଠାରୁ ନ୍ୟୁଜିଲ୍ୟାଣ୍ଡ ବିପକ୍ଷ ସିରିଜରେ ଭାରତ ତିନୋଟି ଟି -୨୦ ଅନ୍ତର୍ଜାତୀୟ ଏବଂ ସମାନ ସଂଖ୍ୟକ ଦିନିକିଆ ଖେଳିବ । ରୋହିତ ଶର୍ମାଙ୍କ ଅନୁପସ୍ଥିତିରେ ହାର୍ଦ୍ଦିକ ପାଣ୍ଡ୍ୟା ସ୍ୱଳ୍ପ ଫର୍ମାଟରେ ଦଳର ନେତୃତ୍ୱ ନେବେ ।
ଭାରତର ପୂର୍ବତନ ଅଧିନାୟକ ଶ୍ରୀକାନ୍ତ କହିଛନ୍ତି ଯେ ୨୦୨୪ ବିଶ୍ୱକପ ପୂର୍ବରୁ ଭାରତକୁ ଅଧିକ ଦ୍ରୁତ ବୋଲିଂ ଅଲରାଉଣ୍ଡର ଖୋଜିବାକୁ ପଡିବ । “ଆପଣଙ୍କୁ ଅଧିକ ଦ୍ରୁତ ବୋଲିଂ ଅଲରାଉଣ୍ଡର ଦରକାର । ଆପଣ ୧୯୮୩ ବିଶ୍ୱକପ୍, ୨୦୧୧ ବିଶ୍ୱକପ୍ ଏବଂ ୨୦୦୭ ଟି -୨୦ ବିଶ୍ୱକପ୍କୁ ଦେଖନ୍ତି । ଆମେ କାହିଁକି ଏଗୁଡିକ ଜିତିଲୁ, କାରଣ ଆମର ଅଧିକ ଦ୍ରୁତ ବୋଲିଂ ଅଲରାଉଣ୍ଡର ଥିଲେ ଏବଂ ସେଠାରେ କିଛି ଖେଳାଳି ଥିଲେ ଯେଉଁମାନେ ବ୍ୟାଟିଂ କରିବା ସହିତ ବୋଲିଂ ମଧ୍ୟ କରିପାରୁଥିଲେ ।
