ନୂଆଦିଲ୍ଲୀ : ଭାରତୀୟ କ୍ରିକେଟର ଅନ୍ୟତମ ପ୍ରତିଷ୍ଠିତ ବ୍ୟକ୍ତିତ୍ୱ ତଥା ବର୍ତ୍ତମାନର ମୁଖ୍ୟ କୋଚ୍ ରବି ଶାସ୍ତ୍ରୀ ବୁଧବାର ୫୮ ବର୍ଷ ବୟସରେ ପଦାର୍ପଣ କରିଛନ୍ତି । ତେବେ ଲକ୍ଡାଉନ୍ ଯୋଗୁଁ କୌଣସି ପାର୍ଟି କିମ୍ବା ସେହିଭଳି ଉତ୍ସବ ଦେଖିବାକୁ ମିଳିନାହିଁ । ସୋଶିଆଲ୍ ମିଡ଼ିଆ ଜରିଆରେ ଶାସ୍ତ୍ରୀ ଉତ୍ସବ ମନାଇଥିଲେ । ଏହି ଅବସରରେ ଭାରତୀୟ କ୍ରିକେଟ୍ ଟିମ୍ ତାଙ୍କୁ ହାର୍ଦ୍ଦିକ ଶୁଭେଚ୍ଛା ଓ ଅଭିନନ୍ଦନ ଜଣାଇଛନ୍ତି । ବିରାଟ କୋହଲି, ଆଜିଙ୍କ୍ୟା ରାହଣେ, ମହେନ୍ଦ୍ର ସିଂ ଧୋନି, ଚେତେଶ୍ୱର ପୂଜାରା, ଶିଖର ଧାୱନ, ସୁରେଶ ରାଇନା, କୁଲଦୀପ ଯାଦବ, ଈଶାନ୍ତ ଶର୍ମା, ବିସିସିଆଇ ସଭାପତି ସୌରଭ ଗାଙ୍ଗୁଲିଙ୍କ ସମେତ ବହୁ ଭାରତୀୟ କ୍ରିକେଟର ଓ ପୂର୍ବତନ ମହାନ୍ କ୍ରିକେଟର ତାଙ୍କୁ ଶୁଭେଚ୍ଛା ଜଣାଇଛନ୍ତି । ସେହିିପରି, ଅନେକ ବିଦେଶୀ କ୍ରିକେଟର ମଧ୍ୟ ଫୋନ୍ ଓ ସୋଶିଆଲ୍ ମିଡ଼ିଆ ଜରିଆରେ ଅଭିନନ୍ଦନ ଜଣାଇଛନ୍ତି । ଜନ୍ମଦିନ ଅବସରରେ କ୍ରିକେଟରମାନେ ତାଙ୍କ ସହିତ ବିତାଇଥିବା ବିଭିନ୍ନ ମୁହୂର୍ତ୍ତର ଫଟୋ ପୋଷ୍ଟିଂ କରିଛନ୍ତି । ଯାହାକୁ ଶାସ୍ତ୍ରୀ ମନଭରି ଉପଭୋଗ କରିଥିବା କଥା ନିଜ ଟ୍ୱିଟର ଆକାଉଣ୍ଟରେ ଉଲ୍ଲେଖ କରିଛନ୍ତି ।
