ଭୁବନେଶ୍ୱର,୨୦/୫ : ଆସନ୍ତା ଜୁନ୍ ୧୨ ତାରିଖରେ ବାରବାଟୀ ଷ୍ଟାଡିୟମରେ ହେବାକୁ ଥିବା ଭାରତ-ଦକ୍ଷିଣ ଆଫ୍ରିକା ଟି-ଟ୍ୱେଣ୍ଟି ମ୍ୟାଚ ପାଇଁ ଆସନ୍ତା ଜୁନ୍ ୧ ତାରିଖରୁ ଆରମ୍ଭ ହେବ ଟିକେଟ ବିକ୍ରି । ଓଡ଼ିଶା କ୍ରିକେଟ ଆସୋସିଏସନ(ଓସିଏ) ସଂପାଦକ ସଞ୍ଜୟ ବେହେରା ଆଜି ଏହି ସୂଚନା ଦେଇ କହିଛନ୍ତି ଯେ ଜୁନ ଏକ ତାରିଖରୁ ଅନଲାଇନ ଟିକେଟ ବିକ୍ରି ଆରମ୍ଭ ହେବ । ଜୁନ ୯ ଓ ୧୦ ତାରିଖରେ ଷ୍ଟାଡିୟମ କାଉଣ୍ଟରରେ ଅଫଲାଇନ ଟିକେଟ ବିକ୍ରି ହେବ । ପୂର୍ଣ୍ଣ ଦର୍ଶକରେ ମ୍ୟାଚ ଅନୁଷ୍ଠିତ ହେବ । ଅନଲାଇନରେ ପେଟିଏମରେ ମୋଟ ୫ ହଜାର ଟିକେଟ ବିକ୍ରି ହେବ । ବିଭିନ୍ନ ଷ୍ଟାଣ୍ଡ ବା ଗ୍ୟାଲେରୀ ପାଇଁ ଟିକେଟ ମୂଲ୍ୟ ଧାର୍ଯ୍ୟ ହୋଇଛି । ଗ୍ୟାଲେରୀ ୧,୩ ଓ ୫ ପାଇଁ ଟିକେଟ ମୂଲ୍ୟ ୯୦୦ ଟଙ୍କା ରହିଥିବାବେଳେ ଗ୍ୟାଲେରୀ ୨ ଓ ୪ର ମୂଲ୍ୟ ୭୦୦ ଟଙ୍କା ରଖାଯାଇଛି । ଗ୍ୟାଲେରୀ ୭ର ମୂଲ୍ୟ ୬୦୦ ଟଙ୍କା ରଖାଯାଇଛି । ସେହିପରି,ସ୍ପେଶାଲ ଏନକ୍ଲୋଜର ପାଇଁ ଟିକେଟ ମୂଲ୍ୟ ୫ହଜାର ଟଙ୍କା ରଖାଯାଇଥିବା ବେଳେ ଏସି ବକ୍ସ ପାଇଁ ମୂଲ୍ୟ ୭ ହଜାର ଟଙ୍କା,ନ୍ୟୁ ପାଭିଲିଅନ ପାଇଁ ୮ ହଜାର ଓକର୍ପୋରେଟ ବକ୍ସ ପାଇଁ ଟିକେଟ ମୂଲ୍ୟ ୧୨ ହଜାର ଟଙ୍କା ରଖାଯାଇଛି । ପ୍ରାୟ ୪୪ ହଜାର ଦର୍ଶକ ମ୍ୟାଚ ଦେଖିବାକୁ ଆସିବେ ବୋଲି ଅନୁମାନ କରାଯାଉଛି । ଟ୍ରାଫିକ ତଥା ପାର୍କିଂ ପାଇଁ ଆବଶ୍ୟକ ବ୍ୟବସ୍ଥା କରାଯାଇଛି । ବାଲି ଯାତ୍ରା ପଡ଼ିଆରେ ପାର୍କିଂ ବ୍ୟବସ୍ଥା କରାଯାଇଛି । ଦୁଇ ଦଳର ଖେଳାଳିମାନେ ଆସନ୍ତା ଜୁନ ୧୦ ତାରିଖରେ
ଭୁବନେଶ୍ୱରରେ ପହଞ୍ଚିବେ ବୋଲି ଶ୍ରୀ ବେହେରା ଜଣାଇଛନ୍ତି ।
