ନୂଆଦିଲ୍ଲୀ, ୨୩/୩ : ଆଇସିସି ଆଜି ଜାରି କରିଛି ଦିନିକିଆ ମାନ୍ୟତା ତାଲିକା । ଏଥିରେ ଭାରତୀୟ ଅଧିନାୟକ ରୋହିତ ଶର୍ମାଙ୍କ ମାନ୍ୟତାରେ ଅବନତି ଘଟିଛି । ରୋହିତ ଗୋଟିଏ ସ୍ଥାନ ତଳକୁ ଖସି ଚତୁର୍ଥରେ ରହିଛନ୍ତି । ରୋହିତ ଦିନିକିଆ ରେଟିଂ ପଏଣ୍ଟ ୭୯୧ ରହିଛି । ସେହିପରି,ବିରାଟ କୋହଲି ୮୧୧ ରେଟିଂ ପଏଣ୍ଟ ସହ ପୂର୍ବବତ୍ତ ଦ୍ୱିତୀୟ ସ୍ଥାନ ବଜାୟ ରଖିଛନ୍ତି । ବିରାଟ ଏବଂ ରୋହିତଙ୍କୁ ବାଦ୍ ଦେଲେ ଆଇସିସି ଦିନିକିଆ ବ୍ୟାଟସମ୍ୟାନର ଟପ୍-୧୦ ତାଲିକାରେ ଆଉ କୌଣସି ଭାରତୀୟ ବ୍ୟଟସମ୍ୟାନ ନାହାନ୍ତି । ପାକିସ୍ତାନର ଅଧିନାୟକ ବାବର ଆଜମ ୮୭୩ ରେଟିଂ ପଏଣ୍ଟ ସହ ଶୀର୍ଷରେ ଅଛନ୍ତି । ବାଂଲାଦେଶ ବିପକ୍ଷ ଦ୍ୱିତୀୟ ଦିନିକିଆରେ ୪୧ ବଲ୍ରୁ ୬୨ ରନର ଇନିଂସ ଖେଳିଥିବା କ୍ୱିଣ୍ଟନ ଡିକକ୍ ଗୋଟିଏ ସ୍ଥାନ ଉନ୍ନତି ଘଟାଇ ତୃତୀୟରେ ପହଞ୍ଚିଛନ୍ତି । ତାଙ୍କ ଦେଶର ରସି ଭାନ ଡର ଡସେନ ଦୁଇଟି ସ୍ଥାନ ଉପରକୁ ଉଠି ଷଷ୍ଠ ସ୍ଥାନରେ ପହଞ୍ଚିଛନ୍ତି । ବୋଲିଂ ତାଲିକାରେ ଯଶପ୍ରୀତ ବୁମରା ଏକ ମାତ୍ର ଭାରତୀୟ ବୋଲର ଭାବେ ଟପ୍-୧୦ରେ ଅଛନ୍ତି । ବୁମରା ୬୭୯ ରେଟିଂ ସହ ଷଷ୍ଠ ସ୍ଥାନରେ ଅଛନ୍ତି । ନ୍ୟୁଜିଲାଣ୍ଡର ଦ୍ରୁତ ବୋଲର ଟ୍ରେଣ୍ଟ ବୋଲ୍ଟ ୭୩୭ ରେଟିଂ ସହ ଶୀର୍ଷରେ ଅଛନ୍ତି । ବୋଲିଂ ତାଲିକାରେ ଟପ୍-୭ରେ କୌଣସି ପରିବର୍ତ୍ତନ ହୋଇ ନାହିଁ । ମାତ୍ର ବାଂଲାଦେଶ ବିପକ୍ଷରେ ନିଜ କ୍ୟାରିୟରରେ ଦ୍ୱିତୀୟ ପାଞ୍ଚ ୱିକେଟ୍ ହାସଲ କରିଥିବା ଦକ୍ଷିଣ ଆଫ୍ରିକାର ଦ୍ରୁତ ବୋଲର କାଗିସୋ ରାବଡା ପଞ୍ଚମ ସ୍ଥାନ ଉନ୍ନତି ଘଟାଇ ଅଷ୍ଟମରେ ପହଞ୍ଚିଛନ୍ତି ।
