ବେଙ୍ଗାଲୁରୁ : ଭାରତ ଏବଂ ଶ୍ରୀଲଙ୍କା ମଧ୍ୟରେ ଚାଲିଥିବା ଦୁଇ ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜର ଦ୍ୱିତୀୟ ମ୍ୟାଚ୍ ବେଙ୍ଗାଲୁରୁର ଏମ ଚିନ୍ନାସ୍ୱାମୀ ଷ୍ଟାଡିୟମରେ ଖେଳାଯାଉଛି । ଆଜି ମ୍ୟାଚର ଦ୍ୱିତୀୟ ଦିନ । ଭାରତ ବିପକ୍ଷ ଦିବରାତ୍ରୀ ଟେଷ୍ଟର ଦ୍ୱିତୀୟ ଦିନରେ ଶ୍ରୀଲଙ୍କା ପ୍ରଥମ ଇନିଂସରେ ୧୦୯ ରନରେ ଅଲଆଉଟ ହୋଇଯାଇଛି । ଶ୍ରୀଲଙ୍କା ପାଇଁ ଆଞ୍ଜେଲୋ ମାଥ୍ୟୁସ୍ ୪୩ ରନ୍ ସଂଗ୍ରହ କରିଥିବା ନିରୋଶନ ଡିକୱେଲା ୨୧ ରନ କରି ଆଉଟ୍ ହୋଇଥିଲେ । ଜସପ୍ରୀତ ବୁମରା ୫ ଟି ୱିକେଟ୍ ନେଇଥିବାବେଳେ ମହମ୍ମଦ ଶାମି ଭାରତ ପାଇଁ ଦୁଇଟି ୱିକେଟ୍ ନେଇଛନ୍ତି । ଟିମ୍ ଇଣ୍ଡିଆର ପ୍ରଥମ ଇନିଂସରେ ଶ୍ରେୟସ୍ ଆୟର ୧୦ ଟି ଚୌକା ଓ ୪ ଛକା ସହାୟତାରେ ୯୮ ବଲରେ ୯୨ ରନ ସ୍କୋର କରିଥିଲେ । ତାଙ୍କ ବ୍ୟତୀତ ବିରାଟ କୋହଲି ୨୩ ଏବଂ ଋଷଭ ପନ୍ତ ୩୯ ରନ ସ୍କୋର କରିଥିଲେ । ଟିମ୍ ଇଣ୍ଡିଆ ପ୍ରଥମ ଇନିଂସରେ ୨୫୨ ରନ୍ ସଂଗ୍ରହ କରିଥିଲା, ଯେଉଁଥିପାଇଁ ଶ୍ରୀଲଙ୍କାର ଦଳ ୧୪୩ ରନ୍ ପଛରେ ରହିଛି ।
ଏହାପୂର୍ବରୁ ଭାରତ ମୋହାଲିରେ ପ୍ରଥମ ଟେଷ୍ଟରେ ଶ୍ରୀଲଙ୍କାକୁ ଏକ ଇନିଂସ ଏବଂ ୨୨୨ ରନରେ ପରାସ୍ତ କରିଥିଲା ।
