ମୁମ୍ବାଇ : ଇଣ୍ଡିଆନ୍ ପ୍ରିମିୟର ଲିଗ୍ (ଆଇପିଏଲ୍) ୨୦୨୨ର ସବୁଠାରୁ ରୋମାଞ୍ଚକର ମ୍ୟାଚ୍ ଗୁରୁବାର ମୁମ୍ବାଇ ଇଣ୍ଡିଆନ୍ସ ଏବଂ ଚେନ୍ନାଇ ସୁପରକିଙ୍ଗ୍ସ ମଧ୍ୟରେ ଖେଳାଯାଇଥିଲା । ଏହି ମ୍ୟାଚ୍ ମୁମ୍ବାଇର ଡକ୍ଟର ଡି ପାଟିଲ ସ୍ପୋର୍ଟସ ଏକାଡେମୀ ଷ୍ଟାଡିୟମରେ ଖେଳାଯାଇଥିଲା । ମହେନ୍ଦ୍ର ସିଂ ଧୋନି ଶେଷ ବଲରେ ଚୌକା ମାରି ସିଏସକୁ ଚମତ୍କାର ବିଜୟ ପ୍ରଦାନ କରିଥିଲେ । ମ୍ୟାଚ୍ ପରେ ଅଧିନାୟକ ରବିନ୍ଦ୍ର ଜାଡେଜା ଧୋନିଙ୍କୁ ଉଚ୍ଚ ପ୍ରଶଂସା କରିଥିଲେ । ମ୍ୟାଚ୍ ପରେ ଜାଡେଜା ପଡ଼ିଆକୁ ଯିବାବେଳେ ଧୋନିଙ୍କ ଆଗରେ ନତମସ୍ତଷ୍କ ହୋଇ ସଲାମ ଜଣାଇଥିଲେ ।
ମ୍ୟାଚ୍ ପରେ ଜାଡେଜା କହିଛନ୍ତି, ଖେଳ ଯେପରି ଆଗକୁ ବଢୁଥିଲା, ଆମେ ସମସ୍ତେ ବହୁତ ଟେନସନ୍ ହୋଇଥିଲୁ, କିନ୍ତୁ ପଡିଆରେ ଶ୍ରେଷ୍ଠ ଫିନିସର୍ ଉପସ୍ଥିତ ଥିଲେ । ସେ (ଧୋନୀ) ଶେଷ ପର୍ଯ୍ୟନ୍ତ କ୍ରିଜରେ ରହି ଆମକୁ ବିଜୟ ପ୍ରଦାନ କରିଥିଲେ । ମୁକେଶ ଚୌଧୁରୀଙ୍କ ପାଇଁ ଜାଡେଜା କହିଛନ୍ତି ଯେ ସେ ପାୱାରପ୍ଲେରେ ବହୁତ ଭଲ ପ୍ରଦର୍ଶନ କରିଛନ୍ତି ।
ତାଙ୍କ ଡ୍ରପ୍ କ୍ୟାଚ୍ ବିଷୟରେ ଜାଡେଜା କହିଛନ୍ତି, ‘ଏମିତି ବେଳେବେଳେ ହୁଏ, ତେଣୁ ମୁଁ ଫିଲ୍ଡିଂକୁ ହାଲୁକା ଭାବେ ଗ୍ରହଣ କରେ ନାହିଁ ଏବଂ କଠିନ ଅଭ୍ୟାସ କରେ । ଆମକୁ ଆମର ଫିଲ୍ଡିଂରେ କାମ କରିବାକୁ ପଡିବ ।
