ନୂଆଦିଲ୍ଲୀ : ସୋସିଆଲ ମିଡିଆରେ ବିରାଟ କୋହଲି ଶାହିନ୍ ଆଫ୍ରିଦିଙ୍କୁ ଭେଟିବାର ଭିଡିଓ ଏବଂ ଚିତ୍ର ଆପଣ ନିଶ୍ଚୟ ଦେଖିଥିବେ, କିନ୍ତୁ ଏହି ଦୁଇଜଣଙ୍କ ମଧ୍ୟରେ କ’ଣ କଥାବାର୍ତ୍ତା ହୋଇଥିଲା ଆପଣ ଜାଣନଥିବେ । କାରଣ ପାକିସ୍ତାନ କ୍ରିକେଟ୍ ର ଅଫିସିଆଲ୍ ଟ୍ୱିଟର ହ୍ୟାଣ୍ଡେଲରେ ପୂର୍ବରୁ ସେୟାର ହୋଇଥିବା ଏହି ଦୁଇଜଣଙ୍କ ସାକ୍ଷାତକାରର ଭିଡିଓରେ ବ୍ୟାକଗ୍ରାଉଣ୍ଡ ଧ୍ୱନି ହେତୁ ଉଭୟଙ୍କ ମଧ୍ୟରେ କଥାବାର୍ତ୍ତା ବୁଝା ପଡିନଥିଲା, କିନ୍ତୁ ବର୍ତ୍ତମାନ ଏଭଳି ଏକ ଭିଡିଓ ସାମ୍ନାକୁ ଆସିଛି ଯେଉଁଥିରେ କଥାବାର୍ତ୍ତା ସ୍ପଷ୍ଟ ବାରି ହେଉଛି । ବାସ୍ତବରେ ପାକିସ୍ତାନ କ୍ରିକେଟ୍ ଏହି ନୂଆ ଭିଡିଓ ସେୟାର କରିଛି ।
ଏହି ଭିଡିଓରେ ଆଫ୍ରିଦି ବିରାଟଙ୍କୁ କହୁଛନ୍ତି, ‘ମୁଁ ଆପଣଙ୍କ ପାଇଁ ପ୍ରାର୍ଥନା କରୁଛି, ଆପଣ ଶୀଘ୍ର ଫର୍ମକୁ ଫେରିବେ ।’ ବିରାଟ କିଛି ସମୟ ପାଇଁ ଭଲ ଫର୍ମରେ ନାହାଁନ୍ତି ଏବଂ ପ୍ରଶଂସକମାନେ ଆଶା କରୁଛନ୍ତି ଯେ ବିରାଟ ଏସିଆ କପ୍ ସହିତ ଫର୍ମକୁ ଫେରିବେ । ଏହି ବାର୍ତ୍ତାଳାପ ଦର୍ଶାଏ ଯେ ଉଭୟ ଦେଶର ଖେଳାଳି ପରସ୍ପରକୁ କେତେ ସମ୍ମାନ କରନ୍ତି । ପୂର୍ବରୁ ଜାରି କରାଯାଇଥିବା ଭିଡିଓରେ ଦେଖିବାକୁ ମିଳିଥିଲା ଯେ, ଭାରତୀୟ ଷ୍ଟାର ସ୍ପିନର ୟୁଜେଭେନ୍ଦ୍ର ଚହଲ ମଧ୍ୟ ଶାହିନଙ୍କ ଭେଟି ତାଙ୍କର ଆହତ ସଂପର୍କରେ ପଚାରିଥିଲେ ।
