ହରଭଙ୍ଗା: ବୌଦ୍ଧ ଥାନା ଅନ୍ତର୍ଗତ ହରଭଙ୍ଗା ବ୍ଲକ ସାଂପୋଚ ଗ୍ରାମରେ ଏକ ବୀଭତ୍ସ ହତ୍ୟାକାଣ୍ଡ ଘଟିଛି । ସ୍ୱାମୀର ଟାଙ୍ଗିଆ ଚୋଟରେ ସ୍ତ୍ରୀର ମୃତ୍ୟୁ ଘଟିଥିବା ଜଣାପଡିଛି । ସୂଚନାମତେ ଏକ ଘରୋଇ କଳିରୁ ଏହି ହତ୍ୟାକାଣ୍ଡ ଘଟିଥିବା ଜଣାପଡିଛି । ଆଜି ଦିନପ୍ରାୟ ୧୧ଘଣ୍ଟା ସମୟରେ ଗ୍ରାମର ଭୋଳାନାଥ ସ୍ୱାଇଁ (୫୦) ଓ ସ୍ତ୍ରୀ କସ୍ତୁରୀ ସ୍ୱାଇଁ (୪୫) ମଧ୍ୟରେ ଘରୋଇ କଳି ହୋଇଥିଲା । ସ୍ତ୍ରୀ କସ୍ତୁରୀ ପରିବା କାଟୁଥିବା ସମୟରେ ଉକ୍ତ କଳିକୁ ନେଇ ଭୋଳାନାଥ ଉତକ୍ଷିପ୍ତ ହୋଇ ଏକ ଧାରୁଆ ଟାଙ୍ଗିଆରେ ସ୍ତ୍ରୀର ବେକରେ ଏକ ଚୋଟ ମାରିଥିଲା । ଏହି ଚୋଟରେ ସ୍ତ୍ରୀର ବେକ ଛିଣ୍ଡିଯାଇ ରକ୍ତ ଜୁଡୁବୁଡୁ ହୋଇ ଘଟଣା ସ୍ଥଳରେ ହିଁ ମୃତ୍ୟୁ ଘଟିଥିଲା । ଖବରପାଇ ଘଟଣା ସ୍ଥଳରେ ବୌଦ୍ଧ ପୋଲିସ ପହଞ୍ଚି ମୃତଦେହ ଟାଙ୍ଗିଆ ଜବତ ସହିତ ହତ୍ୟାକାରୀ ଭୋଳାକୁ ଗିରଫ କରିଛି । ପୋଲିସ ଘଟଣାର ତଦନ୍ତ ଜାରିରଖିଛି ।
