ନୂଆପଡ଼ା : ନୂଆପଡା ଜିଲ୍ଲା ସିନାପାଲି ଥାନା ହଲଦିମୁଣ୍ଡା ଗ୍ରାମରେ ଜଣେ ଯୁବକଙ୍କୁ ଠେଙ୍ଗା ପଥରରେ ପିଟିପିଟି ହତ୍ୟା କରିଥିବା ଅଭିଯୋଗରେ ହରିଆଲୁ ବାଗ (୩୮) ନାମକ ଯୁବକକୁ ସିନାପାଲି ପୁଲିସ ଗିରଫ କରି ଆଜି କୋର୍ଟ ଚାଲାଣ କରିଛି । ହଲଦିମୁଣ୍ଡା ଗ୍ରାମର ଗଗନେ ମାଝି ନାମକ ଯୁବକକୁ ହତ୍ୟା କରିଥିବା ନେଇ ପରିବାର ଲୋକେ ସିନାପାଲି ଥାନାରେ ଅଭିଯୋଗ କରିଥିଲେ । ସିନାପାଲି ଥାନାରେ ପରିବାର ଲୋକେ ଅଭିଯୋଗ କରିବା ପରେ ମାମଲା ରୁଜୁ କରି ଆଜି ଜଣେ ଅଭିଯୁକ୍ତ ହରିଆଲୁ ବାଗଙ୍କୁ ସିନାପାଲି ପୋଲିସ କୋର୍ଟ ଚାଲାଣ କରିଥିବା ଜଣାପଡିଛି । ସୂଚନାଯୋଗ୍ୟଯେ ଗତ ଗୁରୁବାର ଦିନ ଦ୍ୱିପହରରେ ମୃତ ଯୁବକଙ୍କ ସହ ସେହି ଗ୍ରାମର ୩ ଭାଇ ମନଧର ବାଗ, ସହଦେବ ବାଗ ଓ ହରିଆଲୁ ବାଗ ପୂର୍ବ ଶତ୍ରୁତାକୁ ନେଇ ଝଗଡ଼ା ହୋଇଥିଲେ । ଏଥିରେ ତିନି ଭାଇ ଠେଙ୍ଗା ପଥରରେ ପିଟିପିଟି ଯୁବକଙ୍କୁ ଲହୁଲୁହାଣ କରିଥିବା ବେଳେ ପରିବାର ଲୋକେ ଉଦ୍ଧାର କରି ତୁରନ୍ତ ଚିକିତ୍ସା ପାଇଁ ସିନାପାଲି ଓ ପରେ ଜିଲ୍ଲା ସରକାରୀ ହସପିଟାଲକୁ ନେଇଥିଲେ । ହେଲେ ଯୁବକ ଜଣକ ଅଧିକ ଗୁରୁତର ହେବାରୁ ଅଧିକ ଚିକିତ୍ସା ପାଇଁ ବୁର୍ଲା ନେଉଥିବା ବେଳେ ଅଧା ବାଟରେ ଯୁବକଙ୍କ ମୃତ ହୋଇଥିଲା । ଏନେଇ ପରିବାର ଲୋକେ ସିନାପାଲି ଥାନାରେ ଅଭିଯୋଗ କଲାପରେ ସିନାପାଲି ପୋଲିସ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିଥିଲା । ଏବଂ ଶବକୁ ଜବତ କରି ବ୍ୟବଚ୍ଛେଦ ପରେ ପରିବାର ଲୋକଙ୍କୁ ହସ୍ତାନ୍ତର କରିଥିଲା । ଆଜି ୩ ଅଭିଯୁକ୍ତଙ୍କ ମଧ୍ୟରୁ ଜଣକୁ ଗିରଫ୍ କରି ସିନାପାଲି ପୋଲିସ କୋର୍ଟଚାଲାଣ କରିଥିବା ବେଳେ ଅନ୍ୟ ୨ ଅଭିଯୁକ୍ତ ଫେରାର ଥିବା ପୋଲିସ ଥାନାଧିକାରୀ ଡମ୍ୱରୁଧର ପ୍ରଧାନ ପ୍ରକାଶ କରିଛନ୍ତି ।
