ବାଲିଗୁଡ଼ା : ଦୁଇ ମୋଟରସାଇକେଲ ମୁହାଁମୁହିଁ ଧକ୍କା, ତିନିଜଣ ଆରୋହୀ ଗୁରୁତର । କନ୍ଧମାଳ ଜିଲ୍ଲା ଦାରିଙ୍ଗବାଡ଼ି ଥାନା ଅନ୍ତର୍ଗତ ୫୯ ନମ୍ବର ଜାତୀୟ ରାଜପଥ ତିନିଛକରେ ଘଟିଛି ଦୁର୍ଘଟଣା । ଦୁର୍ଘଟଣାରେ ଦାରିଙ୍ଗବାଡ଼ି ଥାନା ସିମନବାଡ଼ି ଗ୍ରାମର ପ୍ରଫୁଲ ସଭାସୁନ୍ଦର, ତାଙ୍କ ବଡ ପୁଅ ସଞ୍ଜୟ ସଭାସୁନ୍ଦର ଏବଂ ଗ୍ରୀନବାଡି ଗ୍ରାମର ଚନ୍ଦନ କୁମାର ସାହୁ ଆହତ ହୋଇଥିବା ଜଣାପଡ଼ିଛି । ସ୍ଥାନୀୟ ଲୋକଙ୍କ ସହାୟତାରେ ଆହତଙ୍କୁ ଦାରିଙ୍ଗବାଡି ଗୋଷ୍ଠି ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଥିବା ବେଳେ ପ୍ରାଥମିକ ଚିକିତ୍ସା ପରେ ଦୁଇ ଜଣଙ୍କୁ ସ୍ୱାସ୍ଥ୍ୟ ଅବସ୍ଥା ଗୁରୁତର ଥିବାରୁ ସେମାନଙ୍କୁ ବ୍ରହ୍ମପୁର ବଡ଼ ମେଡ଼ିକାଲକୁ ସ୍ଥାନାନ୍ତର କରାଯାଇଛି । ଘଟଣା ସମ୍ପର୍କରେ ଖବରପାଇ ଦାରିଙ୍ଗବାଡ଼ି ପୋଲିସ୍ ଘଟଣାସ୍ଥଳରେ ପହଞ୍ଚି ଦୁଇ ବାଇକ ଜବତ କରିବା ସହ ତଦନ୍ତ ଆରମ୍ଭ କରିଥିବା ଜଣାପଡ଼ିଛି । ସୂଚନା ପ୍ରକାରେ ସିମନବାଡ଼ି ଗ୍ରାମର ପ୍ରଫୁଲ୍ଲ ସଭାସୁନ୍ଦର ଓ ତାଙ୍କ ବଡ ପୁଅ ସଞ୍ଜୟ ସଭାସୁନ୍ଦର ଦୁହେଁ ମିଶି ଏକ ସ୍ପେଲଣ୍ଡର ପ୍ଲସ୍ ମୋଟରସାଇକେଲ ଯୋଗେ ଦାରିଙ୍ଗବାଡି ପେଟ୍ରୋଲ ପମ୍ପରୁ ସିମନବାଡ଼ି ଅଭିମୁଖେ ଫେରୁଥିବା ସମୟରେ ତିନି ଛକ ନିକଟରେ ବିପରୀତ ଦିଗରୁ ଏକ ଜାଭା ମୋଟରସାଇକେଲ ଭାରସାମ୍ୟ ହରାଇ ତାଙ୍କୁ ଆଗପଟରୁ ଧକ୍କା ଦେଇଥିଲା । ଫଳରେ ତିନିଜଣ ଆହତ ହୋଇଥିବା ଜଣାପଡ଼ିଛି ।
