ବଲାଙ୍ଗୀର : ସକାଳୁ ସକାଳୁ ଲୋଇସିଂହା ବ୍ଳକ ଭାଲୁପାଲି ଗାଁରେ ଜଙ୍ଗଲି ହାତୀଙ୍କ ଉତ୍ପାତ କରିଥିବା ଖବର ହସ୍ତଗତ ହୋଇଛି । ହାତୀ ଆକ୍ରମଣରେ ଭାଲୁପାଲି ଗାଁର ଗୋପାଳ ପୋଢ (୪୭ବର୍ଷ)ଙ୍କ ମୃତ୍ୟୁ ଘଟିଥିବା ବେଳେ ଅନ୍ୟ ୨ଆହତ ଅଳ୍ପକେ ରକ୍ଷା ପାଇଛନ୍ତି । ଗତ ୩/୪ ଦିନ ଧରି ଏକ ହାତୀପଲ ରମାଇ ପାହାଡ ସଂରକ୍ଷିତ ଜଙ୍ଗଲ ଆଖପାଖ ଅଞ୍ଚଳରେ ବୁଲୁଛନ୍ତି । ଅଞ୍ଚଳରେ ବ୍ୟାପକ ଧାନ ମାଡିଦଳି ନଷ୍ଟ କରୁଛନ୍ତି । ଆଜିର ଅଘଟଣ ଯୋଗୁଁ ସମଗ୍ର ଅଞ୍ଚଳର ଲୋକେ ଭୟଭୀତ ଅଛନ୍ତି । ପ୍ରାୟ ପ୍ରତିବର୍ଷ ବିଭିନ୍ନ ସମୟରେ ହାତୀ କାରଣରୁ ଧନ ଜୀବନ ନଷ୍ଟ ହେଉଛି । ଏଣୁ ସରକାର ସ୍ଥାୟୀ ସମାଧାନ ପାଇଁ ପଦକ୍ଷେପ ନେବା ସହ ମୃତ ଆହତଙ୍କ ପରିବାରକୁ ଉଚିତ କ୍ଷତିପୂରଣ ସହ କ୍ଷତିଗ୍ରସ୍ତ ଚାଷୀଙ୍କୁ ସହାୟତା ଦେବାକୁ ଦାବୀ କରିଛନ୍ତି ସ୍ଥାନୀୟ ବିଧାୟକ ମୁକେଶ ମହାଲିଙ୍ଗ ।
