ନୂଆଦିଲ୍ଲୀ: ରବିବାର ବାଂଲାଦେଶ ବିପକ୍ଷରେ ଆଇସିସି ମହିଳା ଦିନିକିଆ ବିଶ୍ୱକପ୍ ମ୍ୟାଚ୍ରେ ଫିଲ୍ଡିଂ କରୁଥିବା ସମୟରେ ଫର୍ମରେ ଥିବା ପ୍ରାରମ୍ଭିକ ବ୍ୟାଟର ପ୍ରତୀକା ରାୱଲ୍ ଆଘାତ ପାଇଥିଲେ ଏବଂ ତାଙ୍କୁ ପଡ଼ିଆ ଛାଡ଼ିବାକୁ ପଡିଥିଲା।
ପ୍ରତୀକାଙ୍କ ଆଘାତ ଗୁରୁବାର ସେମିଫାଇନାଲ୍ରେ ଅଷ୍ଟ୍ରେଲିଆ ସହିତ ମୁକାବିଲା କରିବାକୁ ଯାଉଥିବା ଭାରତ ପାଇଁ ଏକ ବଡ଼ ଧକ୍କା। ଡିପ୍ ମିଡ୍ୱିକେଟ୍ରେ ଫିଲ୍ଡିଂ କରୁଥିବା ସମୟରେ, ୨୧ତମ ଓଭରର ଶେଷ ବଲ୍ରେ ପ୍ରତୀକାଙ୍କ ଡାହାଣ ଗୋଡ଼ ମୋଡ଼ି ଯାଇଥିଲା। ଲଗାତାର ବର୍ଷା ଯୋଗୁଁ ତାଙ୍କ ପାଦ ଡିଓ୍ବାଇ ପାଟିଲ୍ ଷ୍ଟାଡିୟମ୍ରେ ଓଦା ମାଟିରେ ଫସି ଯାଇଥିଲା।
ଭାରତୀୟ ଦଳ ପ୍ରବନ୍ଧନ କହିଛି ଯେ ପ୍ରତୀକା ରାୱଲ୍ଙ୍କ ଆଣ୍ଠୁ ଏବଂ ଗୋଡ଼ ଆଘାତ ପାଇଛି, ଏବଂ ବିସିସିଆଇ ଡାକ୍ତରୀ ଦଳ ତାଙ୍କ ଅବସ୍ଥା ଉପରେ ନଜର ରଖିଛି। ପ୍ରତୀକା ବଲ୍ ପାଖରେ ପହଞ୍ଚିଥିଲେ କିନ୍ତୁ ତଳେ ପଡ଼ିଯାଇଥିଲେ, ଯାହା ଫଳରେ ବଲ୍ ସୀମାକୁ ଚାଲିଯାଇଥିଲା। ତାଙ୍କ ସାଥୀ ଖେଳାଳି ଏବଂ ଭାରତୀୟ ସପୋର୍ଟ ଷ୍ଟାଫ୍ ତାଙ୍କ ସାହାଯ୍ୟ ପାଇଁ ଦୌଡ଼ି ଆସିଥିଲେ।
ଗ୍ରାଉଣ୍ଡ ଷ୍ଟାଫ୍ ଦ୍ୱାରା ପଡିଆକୁ ଏକ ଷ୍ଟ୍ରେଚର ଅଣାଯାଇଥିଲା, କିନ୍ତୁ ପ୍ରତୀକା ଭାରତୀୟ ସପୋର୍ଟ ଷ୍ଟାଫ୍ଙଙ୍କ ହାୟତାରେ ପଡିଆ ବାହାରକୁ ଲଙ୍ଗଡ଼ାଇ ଚାଲିଯିବାରୁ ଏହାର ଆବଶ୍ୟକତା ନଥିଲା। ଉପ-ଅଧିନାୟିକା ସ୍ମୃତି ମନ୍ଧାନାଙ୍କ ସହିତ ଏକ ସଫଳ ଓପନିଂ ଯୋଡ଼ି ଗଠନ କରିଥିବା ପ୍ରତୀକା ନ୍ୟୁଜିଲାଣ୍ଡ ବିପକ୍ଷରେ ମ୍ୟାଚ୍ ବିଜୟୀ ୧୨୨ ରନ୍ କରିଥିଲେ, ଯାହା ଭାରତକୁ ସେମିଫାଇନାଲ୍ ପାଇଁ ଯୋଗ୍ୟତା ଅର୍ଜନ କରିବାରେ ସାହାଯ୍ୟ କରିଥିଲା।
ରବିବାର ଭାରତ ଏବଂ ବାଂଲାଦେଶ ମଧ୍ୟରେ ଖେଳାଯାଇଥିବା ମ୍ୟାଚ୍ ବର୍ଷା ଯୋଗୁଁ ବାତିଲ ହୋଇଥିଲା, ଉଭୟ ଦଳକୁ ଗୋଟିଏ ଲେଖାଏଁ ପଏଣ୍ଟ ଦିଆଯାଇଥିଲା। ବର୍ଷା ଯୋଗୁଁ ମ୍ୟାଚ୍ ପ୍ରାୟ ଦୁଇ ଘଣ୍ଟା ୧୫ ମିନିଟ୍ ବିଳମ୍ବ ହୋଇଥିଲା ଏବଂ ମ୍ୟାଚ୍ ୨୭ ଓଭରକୁ ହ୍ରାସ କରାଯାଇଥିଲା। ତା’ପରେ ବାଂଲାଦେଶ ୯ ୱିକେଟରେ ୧୧୯ ରନ୍ କରିଥିଲା। ଭାରତକୁ ୧୨୬ ରନ୍ ର ସଂଶୋଧିତ ଲକ୍ଷ୍ୟ ଧାର୍ୟ୍ୟ କରାଯାଇଥିଲା। ସ୍ମୃତି ମନ୍ଧାନା (୩୪) ଏବଂ ଅମନଜୋତ କୌର (୧୫) ୮.୫ ଓଭରରେ ୫୭ ରନ୍ କରିଥିଲେ ଯେତେବେଳେ ବର୍ଷା ମ୍ୟାଚ୍ ବନ୍ଦ କରିଦେଇଥିଲା। ଏହା ପରେ ଅମ୍ପାୟାରମାନେ ମ୍ୟାଚ୍ ବାତିଲ କରିବାକୁ ନିଷ୍ପତ୍ତି ନେଇଥିଲେ।
