ବାଲିଗୁଡ଼ା: ପ୍ରେମିକକୁ ହତ୍ୟାକରି ଅଖାରେ ପୁରାଇ ଫିଙ୍ଗିଦେଲେ ପ୍ରେମିକାଙ୍କ ସମ୍ପର୍କୀୟ । ଏଭଳି ଏକ ନୃସଂଶ ଘଟଣା ଘଟିଥିବା ସୂଚନା ମିଳିଛି କନ୍ଧମାଳ ଜିଲ୍ଲା ବାଲିଗୁଡ଼ା ଥାନା ଲଣ୍ଡାଗାଁ ଗ୍ରାମପଞ୍ଚାୟତର ପୁଟୁକିପାଲି ଅଞ୍ଚଳରେ । ୧୦ ଦିନ ପରେ ପୁଟୁକିପାଲି ନିକଟସ୍ଥ ଜଙ୍ଗଲରୁ ଆଖାରେ ବନ୍ଧା ହୋଇଥିବା ଅବସ୍ଥାରେ ସମ୍ପୃକ୍ତ ଯୁବକଙ୍କ ଗଳିତ ଶବ ଉଦ୍ଧାର କରିଛି ବାଲିଗୁଡ଼ା ପୋଲିସ୍ । ମୃତକ ବୌଦ୍ଧ ଜିଲ୍ଲା ଘଣ୍ଟାପଡ଼ା ଥାନା ଅଞ୍ଚଳର ବିକଳ ରଣାଙ୍କ ପୁଅ ଶୁକଦେବ ରଣା ହୋଇଥିବା ଜଣାପଡ଼ିଛି । ଘଟଣା ପ୍ରକାରେ ଶୁକଦେବ ରଣାଙ୍କ ପୁଟୁକିପାଲି ଅଞ୍ଚଳର ଜଣେ ଯୁବତୀଙ୍କ ସହ ପ୍ରେମ ସମ୍ପର୍କ ଥିଲା । ପ୍ରେମିକାଙ୍କୁ ଭେଟିବା ପାଇଁ ଶୁକଦେବ ଗତ ଅଗଷ୍ଟ ୨୬ ତାରିଖରେ ପ୍ରେମିକାଙ୍କ ଗାଁ କୁ ଯାଇଥିବା ପରେ ଆଉ ଫେରିନଥିଲେ । ପରିବାର ଲୋକେ ବହୁ ଖୋଜାଖୋଜି କରିବା ପରେ ନିକଟରେ ନୂଆଁଖାଇ ପର୍ବରେ ଘରକୁ ଶୁକଦେବ ଫେରିନଥିବାରୁ ପରିବାର ଲୋକ ଥାନାରେ ନିଖୋଜ ମାମଲା ଅଭିଯୋଗ କରିଥିଲେ । ବାଲିଗୁଡ଼ା ଥାନା ପଟୁକିପାଲି ଅଞ୍ଚଳରୁ ଖବରପାଇ ବାଲିଗୁଡ଼ା ପୋଲିସ୍ ସମ୍ପୃକ୍ତ ଯୁବକଙ୍କ ଗଳିତ ଶବ ଉଦ୍ଧାର କରିଛି । ଘଟଣାରେ ତିନିଜଣଙ୍କୁ ଗିରଫ ମଧ୍ୟ କରିଥିବା ଜଣାପଡ଼ିଛି । ତେବେ ଏହା ଏକ ପ୍ରେମଜନିତ ହତ୍ୟାକାଣ୍ଡ ବୋଲି ପ୍ରାଥମିକ ତଦନ୍ତରୁ ଜାଣିବାକୁ ପାଇଛି ପୋଲିସ୍ ଏବଂ ଗଳିତ ଶବର ଫୋରେନ୍ସିକ୍ ଯାଞ୍ଚ୍ କରିବାକୁ ବ୍ରହ୍ମପୁର ପଠାଇଛି ବାଲିଗୁଡ଼ା ପୋଲିସ୍ । ଘଟଣାର ତଦନ୍ତ ପରେ ହତ୍ୟାକାଣ୍ଡର ସମ୍ପୂର୍ଣ୍ଣ ତଥ୍ୟ ଜଣାପଡ଼ିବ ବୋଲି ବାଲିଗୁଡ଼ା ଥାନା ଅଧିକାରୀ କହିଛନ୍ତି ।
