ଦଶପଲ୍ଲା : ସୀମା ଟପିଲା ଚୋରା ନିଶା ବେପାରୀର ଉତ୍ପାତ, ଅଭିଯୁକ୍ତକୁ ଗିରଫ ଦାବିରେ ରାସ୍ତାରୋକ । ଘଟଣା ଘଟିଛି ଖଣ୍ଡପଡା ଥାନା ପୁଆଣିଆ ଗ୍ରାମରେ । ପୁଆଣିଆ ଗ୍ରାମର କୁନା ବେହେରା ନାମକ ବ୍ୟକ୍ତି ଚୋରା ନିଶା କାରବାର କରିବା ସହ ଗାଁ ରେ ଦାଦାଗିରି କରୁଥୁବା ଗ୍ରାମବାସୀ ଅଭିଯୋଗ କରିଆସୁଥିଲେ । ତେବେ ଗାଁରେ ପୋଖରୀ ଖୋଳା ହେବା ସମୟରେ କୁନା ଗଣ୍ଡଗୋଳ କରି କିଛି ଲୋକଙ୍କୁ ଆକ୍ରମଣ କରିଥିବାବେଳେ ଗାଁ ଲୋକେ ଥାନାର ଦ୍ୱାରସ୍ଥ ହୋଇଥିଲେ । ପୋଲିସ କିଛି ପଦକ୍ଷେପ ନ ନେବା ଯୋଗୁଁ ଗାଁରେ ଉତ୍ତେଜନା ପ୍ରକାଶ ପାଇଥିଲା । ତେବେ କୁନାକୁ ଗିରଫ ଦାବିରେ ପୁଆଣିଆ ଗ୍ରାମର ଶତାଧିକ ଲୋକେ ଶନିବାର ସନ୍ଧ୍ୟାରେ ଖଣ୍ଡପଡ଼ା ଥାନା ଘେରାଉ କରିବାସହ ରାଜରାସ୍ତା ଅବରୋଧ କରିଥିଲେ । ପରେ ପୋଲିସର ବହୁ ବୁଝାସୁଝା ପରେ ବିଳମ୍ବିତ ରାତିରେ ଆନ୍ଦୋଳନ ହଟିଥିଲା ।
