ଗଞ୍ଜାମ/ବ୍ରହ୍ମପୁର: ଟାଉନ ଥାନା ଅନ୍ତର୍ଗତ ବିଜୁ ପଟ୍ଟନାୟକ ପାର୍କ ସମ୍ମୁଖରେ ଏକ ଅଭାବନୀୟ ଘଟଣା ଘଟିଛି । ପ୍ରେମ ପାଇଁ ସର୍ବସମ୍ମୁଖରେ ଧାରୁଆ ବ୍ଲେଡ୍ ସାହାଯ୍ୟରେ ଗେଟ୍ ବଜାର ଧାନମେରା ସାହିର ଦେବା ଅରଫ ନିରାକାର ବିଷୋୟୀ ନିଜ ବେକ କାଟି ଆତ୍ମହତ୍ୟା ଉଦ୍ୟମ କରିଥିଲେ । ଏହି ସମୟରେ ଘଟଣା ସ୍ଥଳେ ଉପସ୍ଥିତ ଥିବା ଲୋକେ ତାଙ୍କୁ ଉଦ୍ଧାର କରିବା ପାଇଁ ଚେଷ୍ଟା ଜାରି ରଖିଥିବା ବେଳେ ଖବର ପାଇ ଟାଉନ ଥାନା ପୁଲିସ ଘଟଣା ସ୍ଥଳେ ପହଞ୍ଚି ରକ୍ତାକ୍ତ ଅବସ୍ଥାରେ ଯୁବକକୁ ଉଦ୍ଧାର କରି ଚିକିତ୍ସା ନିମନ୍ତେ ଏମକେସିଜି ମେଡିକାଲରେ ଭର୍ତ୍ତି କରିଥିଲା । ବର୍ତ୍ତମାନ ଯୁବକଙ୍କ ଚିକିତ୍ସା ଜାରି ରହିଛି । ମିଳିଥିବା ସୂଚନା ପ୍ରକାରେ ବ୍ରହ୍ମପୁର ଗେଟ୍ ବଜାର ଅଞ୍ଚଳର ନିରାକାର ବିଷୋୟୀ ପ୍ରେମ ଜନିତ କୌଣସି କାରଣରୁ ହତାଶ ହୋଇ ବିଜୁ ପଟ୍ଟନାୟକ ପାର୍କ ସମ୍ମୁଖରେ ଏକ ଧାରୁଆ ବ୍ଲେଡ୍ ସାହାଯ୍ୟରେ ନିଜ ବେକକୁ କାଟିଛନ୍ତି । ଏଭଳି ଅଭାବନୀୟ ଘଟଣା ଦେଖି ଘଟଣା ସ୍ଥଳେ ଉପସ୍ଥିତ ଥିବା ଲୋକେ ଭୟଭୀତ ହୋଇ ପୁଲିସକୁ ସୂଚନା ଦେଇଥିଲେ । ଆଉ କିଛି ଲୋକେ ତାଙ୍କୁ ଉଦ୍ଧାର କରିବା ବଦଳରେ କିଏ ଭିଡ଼ିଓ କରୁଥିଲେ ତୋ ଆଉ କିଏ ଫେସ ବୁକ ଲାଇଭ କରିଥିଲେ । ଯାହା ଏବେ ସୋସିଆଲ ମେଡିଆରେ ଭାଇରାଲ୍ ହୋଇଛି । ଖବର ପାଇ ଘଟଣା ସ୍ଥଳରେ ପୁଲିସ ପହଞ୍ଚି ଗୁରୁତର ଯୁବକକୁ ରକ୍ତ ଜୁଡୁବୁଡୁ ଅବସ୍ଥାରେ ଉଦ୍ଧାର କରିବା ସହ ତୁରନ୍ତ ମେଡିକାଲ୍କୁ ପଠାଇଛି । ପ୍ରେମ ଜନିତ କାରଣରୁ ଯୁବକ ଜଣଙ୍କ ଏଭଳି ଚରମ ପନ୍ଥା ଆପଣାଇଥିବା ଅନୁମାନ କରାଯାଉଥିବା ବେଳେ ଘଟଣାର ଅଧିକ ତଦନ୍ତ କରୁଛି ପୁଲିସ ।
