ସୁବର୍ଣ୍ଣପୁର : ଆଜି ସୁବର୍ଣ୍ଣପୁର ଜିଲ୍ଲାରେ ଆଞ୍ଚଳିକ ସମବାୟ ସମିତି ପାଇଁ ନିର୍ବାଚନ ଅନୁଷ୍ଠିତ ହୋଇଥିଲା । ଏଥିରେ ଶିବତୁଲା ଓ ଲକର୍ମାକୁ ନେଇ ଗଠିତ ୬ନଂ ଜୋନ ପାଇଁ ନିର୍ବାଚନ ଲଢ଼ିଥିଲେ ଅଧୁନା କଳାପଥର ଗ୍ରାମପଞ୍ଚାୟତ ର ସମିତି ସଭ୍ୟ ତଥା କଳାପଥର ପେକ୍ସ ସଭାପତି ଥିବା ଅରବିନ୍ଦ ବାରିକ ଓ ବୈଦ୍ୟନାଥ ପେକ୍ସ ସଭାପତି ରାଜକିଶୋର ସୁନା । ସମୁଦାୟ ଭୋଟର ୨୦ ଜଣ ଥିବା ବେଳେ ଅରବିନ୍ଦଙ୍କ ସପକ୍ଷରେ ୧୦ଖଣ୍ଡ ଭୋଟ ପଡିଥିଲା ତଥା ରାଜକିଶୋରଙ୍କୁ ୯ଖଣ୍ଡ ଭୋଟ ମିଳିଥିଲା ଓ ଗୋଟିଏ ଭୋଟ ନାକଚ ହୋଇଥିବା ଜଣାପଡିଛି । ପ୍ରକାଶ ଯୋଗ୍ୟ ଯେ ସୁବର୍ଣ୍ଣପୁରର ଜଣାଶୁଣା ଯୁବନେତା ଅରବିନ୍ଦ ବାରିକ କ୍ରମାଗତ ଭାବରେ ବିଭିନ୍ନ ସମୟରେ ପିଆର୍ଆଇ ମେମ୍ବର ଭାବରେ ନିର୍ବାଚିତ ହେଉଥିବାବେଳେ ରାଜକିଶୋର ସୁନା ମଧ୍ୟ ଶାସକ ବିଜେଡ଼ି ଦଳର ବିଭିନ୍ନ ପଦପଦବୀରେ ଅଧିଷ୍ଠିତ ଥାଇ ଗତଥର ତାଙ୍କର ସହଧର୍ମିଣୀଙ୍କୁ ସୋନପୁର ବ୍ଲକ ଅଧ୍ୟକ୍ଷା ପଦରେ ବସାଇବାରେ ସମର୍ଥ ହୋଇଥିଲେ । ଆଜି ଆଞ୍ଚଳିକ ସମବାୟ ସମିତିର ନିର୍ଦ୍ଦେଶକ ଭାବରେ ଅରବିନ୍ଦଙ୍କ ବିଜୟରେ ଜିଲ୍ଲାର ସମବାୟ ପ୍ରେମୀଙ୍କ ମଧ୍ୟରେ ଖୁସି ଅନୁଭବ ହୋଇଥିବା ବେଳେ ବିଭିନ୍ନ ମହଲରୁ ଶ୍ରୀ ବାରିକଙ୍କୁ ଅଭିନନ୍ଦନର ସୁଅ ଛୁଟିଛି ।
