ଜି. ଉଦୟଗିରି : ଜି. ଉଦୟଗିରି ନିକଟସ୍ଥ ସରକାରୀ ଡି.ଏ.ଭି. ମାଧ୍ୟମିକ ପ୍ରଶିକ୍ଷଣ ବିଦ୍ୟାଳୟରେ ଦୁଇ ଦିନିଆ ଯୋଗ ପ୍ରଶିକ୍ଷଣ ଶିବିର ଆଜି ଉଦଘାଟିତ ହୋଇଯାଇଛି । ଶିକ୍ଷାନୁଷ୍ଠାନ ଅଧ୍ୟକ୍ଷ ତ୍ରିଲୋଚନ ପଣ୍ଡାଙ୍କ ତତ୍ତ୍ୱାବଧାନରେ ଆୟୋଜିତ ଏହି କାର୍ଯ୍ୟକ୍ରମକୁ ଜିଲ୍ଲା ଶିକ୍ଷା ନିରୀକ୍ଷକ ସୁଧିର କୁମାର ଦିଗାଳ ଆନୁଷ୍ଠାନିକ ଭାବେ ପ୍ରଦୀପ ପ୍ରଜ୍ୱଳନ କରି ଉଦଘାଟନ କରିଥିବା ବେଳେ ସମ୍ମାନୀତ ଅତିଥିଭାବେ ଡାକ୍ତର ସତ୍ୟ ନାରାୟଣ ପଟ୍ଟନାୟକ ଯୋଗ ଦେଇ ଯୋଗ ଏବଂ ଆୟୁର୍ବେଦ ଦ୍ୱାରା କିଭଳି ଏକ ସୁସ୍ଥ ନିରୋଗ ସମାଜ ଗଠନ କରାଯାଇ ପାରିବ ସେ ସଂପର୍କରେ ଆଲୋକପାତ କରିଥିଲେ । ଶିବିରରେ ଜିଲ୍ଲା ଯୋଗ ପ୍ରଭାରୀ ତଥା ଯୋଗ ଗୁରୁ ବଟ୍ଟକୃଷ୍ଣ ଦାସ, ଯୋଗ ଗୁରୁ ରାଜେନ୍ଦ୍ର ମହାପାତ୍ର ଯୋଗ ଦେଇ ଆସନ, ପ୍ରାଣାୟମ ପ୍ରଶିକ୍ଷଣ ଦେଇଥିଲେ । ଶିବିରକୁ ବିଜ୍ଞାନ ଶିକ୍ଷକ ସୁଧିର କୁମାର ସାହୁ ପରିଚାଳନା କରିଥିବା ବେଳେ ଶିକ୍ଷକ ସରତ କୁମାର ସାହୁ, କଳିଙ୍ଗା ଆଶ୍ରମ ସ୍କୁଲ ପ୍ରଧାନ ଶିକ୍ଷକ ସନ୍ତେଷ କୁମାର ଭୋଇ ପ୍ରମୁଖ ଯୋଗ ଦେଇ ଛାତ୍ରଛାତ୍ରୀମାନଙ୍କୁ ଉତ୍ସାହିତ କରିଥିଲେ । ଶିବିରରେ ଶତାଧିକ ଛାତ୍ର ଛାତ୍ରୀ ଭସ୍ତ୍ରୀକା, କପାଳଭାତୀ,ବାହ୍ୟ, ଉଜ୍ଜୟୀ, ଅନୁଲୋମ ବିଲୋମ, ଭ୍ରାମରୀ, ଉଦଗୀତ,ପ୍ରଣବ ପ୍ରାଣାୟାମ ଅଭ୍ୟାସ କରିବା ସହିତ ଯୋଗାସନ ଅଭ୍ୟାସ କରିଥିଲେ ।
