ଭୁବନେଶ୍ୱର : ଗୁଳି ଫୁଟିବାରୁ ଜଣେ ଆଇଆଇସିଙ୍କର ଅକାଳ ବିୟୋଗ ହୋଇଯାଇଛି । ଗଞ୍ଜାମର ଗାଙ୍ଗପୁର ଥାନା ଆଇଆଇସି ଦେବ କୁମାର ଗମାଙ୍ଗଙ୍କର ମୃତ୍ୟୁ ହୋଇଥିବା ଜଣାପଡ଼ିଛି । ଆସିକା ଡାକ୍ତରଖାନାରେ ତାଙ୍କର ମୃତ୍ୟୁ ହୋଇଯାଇଛି । ଏନେଇ ଗଞ୍ଜାମ ଏସପି ସୂଚନା ଦେଇଛନ୍ତି । ତେବେ କେଉଁ କାରଣରୁ ଗୁଳି ଫୁଟିଛି ସେନେଇ କିଛି ସ୍ପଷ୍ଟ ହୋଇପାରିନାହିଁ । ଏହାର ଉଚ୍ଚସ୍ତରୀୟ ତଦନ୍ତ ହେବବୋଲି ଜାଣିବାକୁ ମିଳିଛି ।
ମିଳିଥିବା ସୂଚନା ଅନୁଯାୟୀ, ସର୍ଭିସ ରିଭଲଭରରୁ ଗୁଳି ଫୁଟିବା ଫଳରେ ଆଇଆଇସି ଦେବକୁମାରଙ୍କର ମୃତ୍ୟୁ ଘଟିଥିଲା । ରକ୍ତ ଜୁଡ଼ୁବୁଡ଼ୁ ଅବସ୍ଥାରେ ତାଙ୍କୁ ତୁରନ୍ତ ହସପିଟାଲରେ ଭର୍ତ୍ତି କରାଯାଇଥିଲା । କିନ୍ତୁ ସେଠାରେ ଡାକ୍ତର ତାଙ୍କୁ ମୃତ୍ୟୁ ଘୋଷଣା କରିଥିଲେ । ତେବେ କେଉଁ ପରିସ୍ଥିତିରେ ଜଣେ ବରିଷ୍ଠ ପୁଲିସ ର୍ଅଧିକାରୀଙ୍କ ସର୍ଭିସ ରିଭଲଭରରୁ ଗୁଳି ଫୁଟିଲା ତାହାକୁ ନେଇ ନାନାଦି ପ୍ରଶ୍ନ ଉଙ୍କି ମାରିବାରେ ଲାଗିଛି । ଏ ସମ୍ପର୍କରେ ସବିଶେଷ ତଥ୍ୟ ପୁଲିସ ପକ୍ଷରୁ ଦିଆଯାଇନାହିଁ । ଖୁବଶୀଘ୍ର ଏନେଇ ସବିଶେଷ ତଥ୍ୟ ପ୍ରଦାନ କରାଯିବ ବୋଲି ଜଣାପଡ଼ିଛି । ଅସାବଧାନତା ଯୋଗୁଁ ଗୁଳି ଫୁଟିଥିବା ପ୍ରାରମ୍ଭିକ ତଦନ୍ତରୁ ଜଣାପଡ଼ିଛି । ଅଂଟା ତଳକୁ ଗୁଳି ବାଜିଥିବା ଜାଣିବାକୁ ମିଳିଛି ।
