ଦଶପଲ୍ଲା : ଆଜି ନୟାଗଡ଼ ଜିଲ୍ଲା ଦଶପଲ୍ଲା ବ୍ଲକ ଟାକରା ଗ୍ରାମପଞ୍ଚାୟତରେ ଥିବା ସରକାରୀ ଉଚ୍ଚ ବିଦ୍ୟାଳୟରେ ଦିନ ୧:୩୦ରେ ନୟାଗଡ଼ ଜିଲ୍ଲାପାଳ ପୋମା ଟୁଡୁ ଅଚାନକ ପରିଦର୍ଶନ କରିଥିଲେ । ଜିଲ୍ଲାପାଳଙ୍କ ସହ ଦଶପଲ୍ଲା ମଣ୍ଡଳ ଉନ୍ନୟନ ଅଧିକାରୀ ବିଶ୍ୱ ରଞ୍ଜନ ବିଶ୍ୱାସ, ଜିଲ୍ଲା ମଂଗଳ ଅଧିକାରୀ ମଧ୍ୟ ସରକାରୀ ଉଚ୍ଚ ବିଦ୍ୟାଳୟରେ ପହଞ୍ଚିଥିଲେ । ବିଦ୍ୟାଳୟର ସମସ୍ତ ଶ୍ରେଣୀ ଗୃହ ବୁଲି ଛାତ୍ର ଛାତ୍ରୀଙ୍କ ସମସ୍ୟା ବୁଝିବା ସହ ପାନୀୟ ଜଳ ସମସ୍ୟାର ସମାଧାନ ପାଇଁ ଅଧିକାରୀମାନଙ୍କ ସହ ଆଲୋଚନା କରି ଏହାର ଆଶୁ ସମାଧାନ ପାଇଁ ପରାମର୍ଶ ଦେଇଥିଲେ । ଏଥି ସହିତ ଶ୍ରେଣୀ ଗୃହର ଉନ୍ନତୀକରଣ ପାଇଁ ମଧ୍ୟ ପ୍ରତିଶ୍ରୁତି ଦେଇଥିଲେ । ବିଦ୍ୟାଳୟ ପରିଚାଳନା କମିଟିର ସଭାପତି ଜଗବନ୍ଧୁ ଆଚାର୍ଯ୍ୟ ଜିଲ୍ଲାପାଳଙ୍କୁ ଶିକ୍ଷକ ସମସ୍ୟା ବିଷୟରେ ଅବଗତ କରିଥିଲେ । ୯ମ ଓ ୧୦ମ ଶ୍ରେଣୀରେ ସଂଖ୍ୟାଧିକ ଛାତ୍ର ଛାତ୍ରୀ ରହିଥିବାରୁ ୨ ଟି ସେକ୍ସନରେ ଭାଗ କରାଯିବା ପାଇଁ ପରିଚାଳନା କମିଟି ସଭାପତି ଅନୁରୋଧ କରିଥିଲେ । ବିଦ୍ୟାଳୟ ପରିଦର୍ଶନ ସମୟରେ ସ୍ଥାନୀୟ ସରପଞ୍ଚ ମଦନ କୁମାର ଜାନୀ ଓ ସମିତି ସଭ୍ୟ ପ୍ରଶାନ୍ତ କୁମାର ଦଳବେହେରା ଉପସ୍ଥିତ ରହିଥିଲେ ।
