ଦଶପଲ୍ଲା : ମଧ୍ୟଖଣ୍ଡ ନୋଡାଲ ହାଇସ୍କୁଲର ହୀରକ ଜୟନ୍ତୀ ଉଦଘାଟନ ଉତ୍ସବ ଆଜି ହାଇସ୍କୁଲ ପରିସରରେ ମହା ସମାରୋହରେ ପାଳିତ ହୋଇଯାଇଛି । ସକାଳୁ ସକାଳୁ ସ୍କୁଲର ଛାତ୍ର ଏବଂ ପୁରାତନ ଛାତ୍ରମାନଙ୍କର ଏକ ସାଇକେଲ ଶୋଭାଯାତ୍ରା ଘୋଳାହାଣ୍ଡି,ମଧ୍ୟଖଣ୍ଡ ଓ ଡିହଗାଁ, ତିନୋଟି ପଞ୍ଚାୟତ ପରିକ୍ରମା କରିଥିଲା । ଏହାକୁ ତିନି ପଞ୍ଚାୟତର ସରପଞ୍ଚ ମାନେ ପତାକା ଦେଖାଇ ଶୁଭାରମ୍ଭ କରିଥିଲେ । ଏହାପରେ ହୀରକ ଜୟନ୍ତୀ ପତାକାକୁ ସ୍କୁଲର ପ୍ରଧାନ ଶିକ୍ଷକ ପୂର୍ଣ୍ଣଚନ୍ଦ୍ର ବଳିଆର ସିଂହ ଉତ୍ତୋଳନ କରିଥିଲେ । ପୂର୍ବାହ୍ନ ଏଗାର ଘଟିକା ସମୟେ ସ୍କୁଲର ପ୍ରତିଷ୍ଠାତା ସ୍ୱର୍ଗତ ରାମଚନ୍ଦ୍ର ପଣ୍ଡାଙ୍କ ପ୍ରତିମୂର୍ତ୍ତୀରେ ମାଲ୍ୟାର୍ପଣ କଲାପରେ ପୁରାତନ ଛାତ୍ର ସଂସଦର ସଭାପତି ଶିଶିର କୁମାର ଦାସଙ୍କ ସଭାପତିତ୍ୱରେ ଉଦଘାଟନୀ ସଭା ଅନୁଷ୍ଠିତ ହୋଇଥିଲା । ଏହି ସଭାରେ ଦଶପଲ୍ଲାର ବିଧାୟକ ରମେଶ ଚନ୍ଦ୍ର ବେହେରା ମୁଖ୍ୟ ଅତିଥି ଭାବେ ପଞ୍ଚାୟତ ସମିତି ଅଧ୍ୟକ୍ଷା ଶ୍ରୀମତୀ ସୁନନ୍ଦା ସାହୁ ସମ୍ମାନିତ ଅତିଥି ଭାବେ ଯୋଗଦେଇ ମୂଲ୍ୟବାନ ବକ୍ତବ୍ୟ ରଖିଥିଲେ । ପ୍ରଥମେ ସ୍କୁଲର ପୁରାତନ ଛାତ୍ର ତଥା ପ୍ରାକ୍ତନ ଅଧ୍ୟକ୍ଷ ମାଧବ ଚନ୍ଦ୍ର ମିଶ୍ର ସ୍ୱାଗତ ଭାଷଣ ଦେଇଥିଲେ । ସ୍କୁଲର ପ୍ରଧାନ ଶିକ୍ଷକ ବାର୍ଷିକ ରିପୋର୍ଟ ଉପସ୍ଥାପନ କରିବା ସହିତ ଅଭିଭାଷଣ ରଖିଥିଲେ ।ପୁରାତନ ଛାତ୍ର ସଂସଦର ସମ୍ପାଦକ ଦୁଃଖୀଶ୍ୟାମ ଦାଶ ଅଭିଭାଷଣ ରଖିଥିବା ବେଳେ ପୁରାତନ ଛାତ୍ର ଆଡଭୋକେଟ ଶରତ ଚନ୍ଦ୍ର ବେହେରା ଧନ୍ୟବାଦ୍ ଦେଇଥିଲେ । ମଧ୍ୟାହ୍ନ ବିରତୀ ପରେ ପୁରାତନ ଛାତ୍ର ସଙ୍ଗୀତଜ୍ଞ ଶରତ କୁମାର ସାହୁଙ୍କ ତତ୍ତ୍ୱାବଧାନରେ ସ୍କୁଲ ପିଲାଙ୍କ ଦ୍ୱାରା ମନୋରଞ୍ଜନ କାର୍ଯ୍ୟକ୍ରମ ପରିବେଷଣ କରାଯାଇଥିଲା । ଏହି କାର୍ଯ୍ୟକ୍ରମ ଦର୍ଶକ ମାନଙ୍କୁ ବିମୋହିତ କରିଥିଲା । ଆଜି ସ୍କୁଲର ପ୍ରତିଷ୍ଠା ଦିବସଠାରୁ ଏହା ବର୍ଷବ୍ୟାପୀ ବିଭିନ୍ନ ଦିନରେ ବିଭିନ୍ନ କାର୍ଯ୍ୟକ୍ରମମାନ ଅନୁଷ୍ଠିତ ହେବାସହ ଶେଷରେ ହୀରକ ଜୟନ୍ତୀ ଉଦଯାପନ ଉତ୍ସବ ମହା ସମାରୋହରେ ଅନୁଷ୍ଠିତ କରାଯିବାର କାର୍ଯ୍ୟକ୍ରମ ରହିଛି ।
