ପଲଶାଗୋରା: ବୌଦ୍ଧ ଜିଲ୍ଲା କଣ୍ଟାମାଳ ବ୍ଲକ ମନମୁଣ୍ଡା ଥାନା ପଲଶାଗୋରାସ୍ଥିତ କାନ୍ଦୁଲମୁଣ୍ଡା ପୋଖରୀରେ ବାଘମୁଣ୍ଡା ଗ୍ରାମର ସୁଶାନ୍ତ ନାଏକ (୩୦) ନାମକ ଯୁବକ ଗାଧୋଉଥିବା ବେଳେ ପାଣିରେ ବୁଡି ମୃତ୍ୟୁବରଣ କରିଛନ୍ତି । ସୂଚନାନୁଯାୟୀ ସୋମବାର ଅପରାହ୍ନ ୪ଟା ବେଳେ ବାଘମୁଣ୍ଡା ଗ୍ରାମର ବଉଲା ନାଏକଙ୍କ ବଡପୁଅ ସୁଶାନ୍ତ ପୋଖରୀକୁ ଗାଧୋଇବାକୁ ଯାଇଥିବା ବେଳେ ପାଣିରେ ବୁଡିଯାଇଥିଲେ । ଠିକ୍ ସେହି ସମୟରେ ୨ ଜଣ ଲୋକେ ଛେଳି ଚରାଉଥିବା ବେଳେ ସୁଶାନ୍ତ ବୁଡିଯାଉଥିବା ଦେଖି କିଛି ଲୋକଙ୍କ ସହାୟତାରେ ତାଙ୍କୁ ଉଦ୍ଧାର କରି ସୋନପୁର ଡାକ୍ତରଖାନାକୁ ନେଇଥିଲେ । ମାତ୍ର ସୁଶାନ୍ତ ସେଠାରେ ପହଞ୍ôଚବା ପରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ସୁଶାନ୍ତ ପଲଶାଗୋରା ଠାରେ ପରିବା ଦୋକାନ ଦେଇ ନିଜ ପରିବାରର ପ୍ରତିପୋଷଣ କରୁଥିଲେ । ତାଙ୍କ ମୃତ୍ୟୁ ଖବର ପାଇଁ ପୋଲଶାଗୋରା ଅଞ୍ଚଳରେ ଶୋକର ଛାୟା ଖେଳିଯାଇଛି । ତାଙ୍କ ପରିବାରକୁ ତୁରନ୍ତ ସରକାରୀ ସହାୟତା ଯୋଗାଇ ଦେବାକୁ ବିଭିନ୍ନ ମହଲରୁ ଦାବି କରାଯାଇଛି ।
