ନୂଆପଡ଼ା : ନୂଆପଡା ଜିଲ୍ଲା ଖଡ଼ିଆଳ ବ୍ଳକ ବଙ୍କାପୁର ଗ୍ରାମର ଗୋଟିଏ ପରିବାରର ଚାରିଜଣ ବିଷାକ୍ତ ଛତୁଖାଇ ଅସୁସ୍ଥ ହୋଇ ଖଡ଼ିଆଳ ଉପଖଣ୍ଡ ଚିକିତ୍ସାଲୟରେ ଭର୍ତ୍ତି ହୋଇ ଚିକିତ୍ସା ହେଉଥିବା ଜଣାପଡିଛି । ସୂଚନା ଅନୁସାରେ ବଙ୍କାପୁର ଗ୍ରାମର ପଦ୍ମାବତୀ ବେହେରା (୪୦) ନିଜ ଜମିକୁ ଆଜି ସକାଳ ସମୟରେ ଯାଇଥିଲେ । ସେଠାରେ ଛତୁ ଥିବାର ଦେଖି ଘରକୁ ଆଣି ରୋଷେଇ କରି ନିଜେ ପଦ୍ମାବତୀ ,ପୁଅ ଭୋଜରାଜ (୧୭),ଝିଅ ସୀମା(୦୯),ପଦ୍ମାବତୀ ଙ୍କ ଭାଇର ଝିଅ ପ୍ରାଚୀ ଖାଇଥିଲେ । ବିଷାକ୍ତ ଛତୁ ଥିବାରୁ ଚାରିଜଣ ଗୁରୁତର ଅସୁସ୍ଥ ହୋଇ ପଡ଼ିଥିଲେ । ସ୍ୱାମୀ ଟଙ୍କଧର କାମ କରିବା ପାଇଁ ବାହାରକୁ ଯାଇଥିଲେ । ଖବର ପାଇ ଘରକୁ ଆସି ଅସୁସ୍ଥ ଥିବା ପରିବାରକୁ ଖଡ଼ିଆଳ ଉପଖଣ୍ଡ ଚିକିତ୍ସାଳୟରେ ଭର୍ତ୍ତି କରିଥିଲେ । ବର୍ତ୍ତମାନ ସମସ୍ତେ ସୁସ୍ଥ ଥିବା ଜଣାପଡିଛି ।
