ଫୁଲବାଣୀ :ଶୁକ୍ରବାର ଶବ ରଖି ଉତ୍ତ୍ୟକ୍ତ ଲୋକଙ୍କ ଜିଲ୍ଲାପାଳ କାର୍ଯ୍ୟାଳୟ ଘେରାଉ । ଫୁଲବାଣୀ ପିଲା ସାଲୁଙ୍କି ନଦୀର ବନ୍ୟା ଜଳର ପ୍ରଖର ସ୍ରୋତରେ ଡାକପାଲା ବ୍ରିଜରୁ ବାଇକ ଆରୋହୀ ତାପସ ରଞ୍ଜନ ଘଟାଲ ଗତ ବୁଧବାର ସନ୍ଧ୍ୟାରେ ବାଇକ ସହ ଭାସି ଯାଇଥିଲେ । ଦିନକ ପରେ ମୃତଦେହ ୧୨ କିମି ଦୂର ଡକାଙ୍ଗି ଠାରେ ନଦୀ ତଟରୁ ଉଦ୍ଧାର କରାଯାଇଥିଲା । ଡାକପାଲା ବ୍ରିଜ ସଂକୀର୍ଣ୍ଣ ଓ କମ ଉଚ୍ଚା ହୋଇଥିବା ଫଳରେ କମ ବର୍ଷା ହେଲେ ମଧ୍ୟ ବ୍ରିଜଉପରେ ପାଣି ଯାଉଛି । ଫଳରେ ବ୍ରିଜ ଆରପଟେ ରହୁଥିବା ମୁନିସିପାଲିଟିର ୨ ନମ୍ବର ୱାର୍ଡର ଶତାଧିକ ଲୋକ ଯିବା ଆସିବାରେ ଅସୁବିଧାର ସମ୍ମୁଖୀନ ହେଉଛନ୍ତି । ବିଭିନ୍ନ ସମୟରେ ବନ୍ୟା ଜଳରେ ଲୋକେ ଭାସିଯାଇ ମୃତ୍ୟୁ ବରଣ କରୁଛନ୍ତି ଓ ଦୁର୍ଘଟଣା ବି ହେଉଛି । ଫଳରେ ସେଠାରେ ଉଚ୍ଚା ପୋଲ ନିର୍ମାଣ ପାଇଁ ଦାବି କରିଛନ୍ତି ଲୋକେ । ତା’ ସାଙ୍ଗକୁ ମୃତକଙ୍କ ପରିବାରକୁ ଉପଯୁକ୍ତ କ୍ଷତିପୂରଣ ମଧ୍ୟ ଦାବି କରିଛନ୍ତି ଲୋକେ । ଏହି ଦୁଇ ଦଫା ଦାବି ନେଇ କନ୍ଧମାଳ ଜିଲ୍ଲାପାଳଙ୍କ କାର୍ଯ୍ୟାଳୟ ଘେରାଉ କରିଛନ୍ତି ଡାକପାଲା ଗ୍ରାମବାସୀ । ପ୍ରଶାସନ ଓ ପୋଲିସ ପହଞ୍ଚି ବୁଝାସୁଝା କରିବା ପରେ ଶବ ସତ୍କାର କରିବା ପାଇଁ ନିଆଯାଇଥିଲା ।
