ଯାଜପୁର: ଯାଜପୁର ଜିଲ୍ଲା ଧର୍ମଶାଳା ତହସିଲ ରାହାଡପୁର ଅଞ୍ଚଳରେ ଥିବା ଶିବଶକ୍ତି କ୍ରସର୍ରେ ଆଜି ଏକ ଅଭାବନୀୟ ଘଟଣା ଘଟିଯାଇଛି ।କ୍ରସର ଚକା ଖୋଲୁଥିବା ବେଳେ ଚାଲି ଯାଇଛି ଜଣେ ନିରୀହ ଶ୍ରମିକର ଜୀବନ । ଖାଲି ସେତିକି ନୁହଁ ଆଉ ଜଣେ ଶ୍ରମିକ ଗୁରୁତର ଅବସ୍ଥାରେ ଜୀବନ ସହ ସଙ୍ଘର୍ଷ କରୁଛନ୍ତି । ସୂଚନା ଅନୁସାରେ ଆଜି ରାହାଡପୁରରେ ଶିବଶକ୍ତି କ୍ରସରରେ କ୍ରସର ଚକା ଖୋଲୁଥିବା ସମୟରେ ଚକା ଖସିପଡ଼ି ଜଣେ ଶ୍ରମିକର ମୃତ୍ୟୁ ହୋଇଥିବାବେଳେ ଅନ୍ୟଜଣେ ଗୁରୁତର ଆହତ ହୋଇ କଟକ ବଡ ଡାକ୍ତରଖାନାକୁ ସ୍ଥାନାନ୍ତର ହୋଇଛି । ଆଶ୍ଚର୍ଯ୍ୟ ଓ ପରିତାପର ବିଷୟ ବିବେକ ଶୂନ୍ୟ କ୍ରସର ମାଲିକ ମୃତ ଶରୀରକୁ ଲୁଚାଇ ଦେବାପାଇଁ ଏକ କଳା ପଲିଥିନ ଗୁଡ଼ାଇ ଏକ ଟାଟା ଏସି ଗାଡ଼ିରେ ମୃତ ଶବକୁ ଲୁଚେଇ ନେଇଯାଉଥିବା ବେଳେ ସ୍ଥାନୀୟ ଲୋକେ ଗାଡ଼ିକୁ ଅଟକାଇ ଜେନାପୁର ଥାନାକୁ ଖବର ଦେଇ ରାସ୍ତାରୋକ କରିଛନ୍ତି । ଜେନାପୁର ପୋଲିସ ଶବକୁ ବ୍ୟବଚ୍ଛେଦ ପାଇଁ ପଠାଇଥିବା ବେଳେ ରାସ୍ତା ଅବରୋଧକାରୀ ମାନେ ଜିଲ୍ଲାପାଳ ଆସି ପ୍ରତିଶ୍ରୁତି ନଦେବା ପର୍ଯ୍ୟନ୍ତ ରାସ୍ତାରୁ ହଟିବେ ନାହିଁ ବୋଲି ଜିଦ୍ ଧରି ରାସ୍ତାରେ ବସିଛନ୍ତି । ଏ ସଂକ୍ରାନ୍ତରେ ସ୍ଥାନୀୟ ପ୍ରଶାସନର ପ୍ରତିକ୍ରିୟା ମିଳିପାରି ନାହିଁ ।
