ବାଲିଗୁଡ଼ା: କନ୍ଧମାଳ ଜିଲ୍ଲା ବାଲିଗୁଡ଼ା ମା ଦକ୍ଷିଣ କାଳୀ କବାଡ଼ି ଟିମ୍କୁ ସମ୍ବର୍ଦ୍ଧିତ କରିବା ଉଦ୍ଦେଶ୍ୟରେ ମା ଦକ୍ଷିଣ କାଳୀ କ୍ଲବ୍ ପକ୍ଷରୁ ମନ୍ଦିର ପରିସରରେ ଏକ ସମ୍ବର୍ଦ୍ଧନା ସଭା ଅନୁଷ୍ଠିତ ହୋଇଯାଇଛି । ଏଥିରେ ମୁଖ୍ୟ ଅତିଥି ଭାବେ ବିଶିଷ୍ଟ ଶିକ୍ଷାବିତ୍ ତଥା ଯୁବ ବ୍ୟବସାୟୀ ମାନସ କୁମାର ଆଚାର୍ଯ୍ୟ ଯୋଗ ଦେଇଥିବା ବେଳେ ସମ୍ମାନିତ ଅତିଥି ଭାବେ ଦଣ୍ଡ ଅଧିକାରୀ ଅଭିରାମ ପଣ୍ଡା, ସଭାପତି ନବଘନ ପାତ୍ର, ପୂର୍ବତନ ଜାତୀୟ କବାଡି ଖେଳାଳି ସୁରେନ୍ଦ୍ର ପାତ୍ର, ଶିକ୍ଷକ ତୀର୍ଥବାସୀ ଘଡ଼ାଇ, ସାମ୍ବାଦିକ ପ୍ରମୋଦ ଦଣ୍ଡସେନା, ବିପ୍ରଚରଣ ସାହୁ, ମକରଧ୍ୱଜ ନାୟକ ପ୍ରମୁଖ ମଞ୍ଚାସୀନ ଥିଲେ । ଯାତ୍ରା ନିର୍ଦ୍ଦେଶକ ତଥା ଶିକ୍ଷକ ଅଶ୍ୱିନୀ ମିଶ୍ର ସଭା ପରିଚାଳନା କରିଥିଲେ । ବାଲିଗୁଡ଼ା ବ୍ଲକ୍ ଅନ୍ତର୍ଗତ ବାରଖମା ଠାରେ ବାରଖମା ସ୍ପୋର୍ଟ୍ସ କ୍ଲବ୍ ଆନୁକୁଲ୍ୟରେ ଚଳିତ ମାସ ୫ ତାରିଖରୁ ଜିଲ୍ଲା ସ୍ତରୀୟ କବାଡି ଟୁର୍ଣ୍ଣାମେଣ୍ଟ ଆରମ୍ଭ ହୋଇଥିଲା । ଏଥିରେ ଜିଲ୍ଲାର ବିଭିନ୍ନ ଅଞ୍ଚଳରୁ ମୋଟ ୨୪ ଦଳ ଭାଗ ନେଇଥିଲେ । ଶେଷରେ ବାଲିଗୁଡ଼ା ମା ଦକ୍ଷିଣ କାଳୀ ଟିମ୍ ଓ ମହାସିଙ୍ଗି ଟିମ୍ ସମସ୍ତଙ୍କୁ ପଛରେ ପକାଇ ଫାଇନାଲକୁ ଉତ୍ତୀର୍ଣ୍ଣ ହୋଇଥିଲେ । ୧୧ ତାରିଖରେ ଫାଇନାଲ ମ୍ୟାଚ ଅନୁଷ୍ଠିତ ହୋଇଥିବା ବେଳେ ମହାସିଙ୍ଗିକୁ ମାତ୍ର ଦେଇ ବାଲିଗୁଡ଼ା ମା ଦକ୍ଷିଣ କାଳୀ କବାଡ଼ି ଟିମ୍ ଚାମ୍ପିୟନ ହୋଇଥିଲା । ଏହି ଅବସରରେ କ୍ଲବ ପକ୍ଷରୁ ସମସ୍ତ ଖେଳାଳିଙ୍କୁ ଉତ୍ତରୀୟ ଦେଇ ସମ୍ମାନିତ କରାଯାଇଥିଲା । ଏଥିସହିତ ଖେଳାଳିଙ୍କ ଖେଳ ଅଭ୍ୟାସ ପାଇଁ ପଡ଼ିଆର ଉନ୍ନତିକରଣ ସହ ସମସ୍ତ ସୁବିଧା ସହଯୋଗ ପାଇଁ ଆମେ ସହଯୋଗ କରିବୁ ବୋଲି କହିଛନ୍ତି ମୁଖ୍ୟ ଅତିଥି । ସେପଟେ ସମସ୍ତ ଅତିଥି ମାନେ ଖେଳାଳିଙ୍କ ଭଲମନ୍ଦ ପଚାରି ବୁଝିବା ସହ ସେମାନଙ୍କ ଉଜ୍ୱଳ ଭବିଷ୍ୟତ କାମନା କରିଥିଲେ । ଏହି ସମ୍ବର୍ଦ୍ଧନା ପରେ ଖେଳାଳିମାନେ ବେସ୍ ଉତ୍ସାହିତ ଥିବା ଦେଖିବାକୁ ମିଳିଥିଲା ।
