କଟକ: ୭୦ତମ ନିଖିଳ ଭାରତ ସମବାୟ ସପ୍ତାହ ଆଜିଠାରୁ ଆରମ୍ଭ ହୋଇଛି । ଏହି ଉପଲକ୍ଷେ ଓଡିଶା ସମବାୟ ସୁରକ୍ଷା ସଂଘ ଓ ପାକ୍ଷିକ ସମ୍ବାଦ ପତ୍ର ସମବୟିକା ପକ୍ଷରୁ ଓଡିଶାରେ ସମବାୟ ଆନ୍ଦୋଳନର ପୁରଧା ଉତ୍କଳ ଗୌରବ ମଧୁସୂଦନ ଦାସଙ୍କ ପ୍ରତିକୃତିରେ ମାଲ୍ୟାର୍ପଣ ସହ ଶ୍ରଦ୍ଧାସୁମନ ଅର୍ପଣ କରାଯାଇଥିଲା । ସମବାୟ ସୁରକ୍ଷା ସଂଘର ସଭାପତି ପ୍ରଫୁଲ କୁମାର ସିଂହଙ୍କ ପରାମର୍ଶକ୍ରମେ ସାଧାରଣ ସମ୍ପାଦକ ପ୍ରତାପ ଚନ୍ଦ୍ର ସାହୁ ତିନିକୋଣିଆ ବଗିଚାସ୍ଥିତ ମଧୁସୂଦନ ମାତୃ ମଙ୍ଗଳ କେନ୍ଦ୍ର ପରିସରରେ ଥିବା ମଧୁବାବୁଙ୍କ ପୂର୍ଣ୍ଣାବୟବରେ ମାଲ୍ୟାର୍ପଣ କରିଥିଲେ । ଅନ୍ୟମାନଙ୍କ ମଧ୍ୟରେ ସାମ୍ବାଦିକ ତଥା ସମବାୟ ପ୍ରେମୀ ମହେଶ ଦାସଙ୍କ ସମେତ କୋମଳମତି ଛାତ୍ର ଛାତ୍ରୀ ମାନେ ପୁଷ୍ପ ପ୍ରଦାନ କରିଥିଲେ । ସମ୍ପାଦକ ଶ୍ରୀ ସାହୁ ମଧୁବାବୁଙ୍କ ଜୀବନୀ ତଥା ଓଡିଶାରେ ସମବାୟ ଭିତ୍ତିଭୂମି ପ୍ରତିଷ୍ଠା କରି ସେ ସମୟରେ ସମାଜରେ ଅବହେଳିତ ଥିବା ଜନସାଧାରଣଙ୍କ ପାଇଁ ଖାଉଟି ଭଣ୍ଡାରଭଳି ଅନେକ ସମବାୟ ଅନୁଷ୍ଠାନ ନିଜ ଉଦ୍ୟମରେ ପ୍ରତିଷ୍ଠା କରିଥିଲେ ବୋଲି ମତ ପ୍ରକାଶ କରିଥିଲେ ।
