ବାଲିଗୁଡ଼ା : କନ୍ଧମାଳ ଜିଲ୍ଲା ରାଇକିଆ ଥାନା ରାମମୁଣ୍ଡା ନିକଟସ୍ଥ ବୁଲାଣି ରାସ୍ତାରେ ମୋଟରସାଇକେଲ ଦୁର୍ଘଟଣାରେ ଜଣେ ଧର୍ମଯାଜକଙ୍କ ମୃତ୍ୟୁ ଘଟିଥିବା ଜଣାପଡ଼ିଛି । ମୃତକ ଦାରିଙ୍ଗବାଡି ବ୍ଲକ୍ ଅଧୀନସ୍ଥ ବ୍ରାହ୍ମଣୀଗାଁ ଥାନା ଗଦାପୁର ଗ୍ରାମପଞ୍ଚାୟତର ଦୁଶାରୀ ଗ୍ରାମର ଦଣ୍ଡପାଣି ମାଝୀ ହୋଇଥିବା ଜଣାପଡ଼ିଛି । ସୂଚନା ପ୍ରକାରେ ଦଣ୍ଡପାଣି କୌଣଶି କାମରେ ଘୁ.ଉଦୟଗିରି ଅଞ୍ଚଳକୁ ଯାଇଥିଲେ । ଆଜି ସକାଳେ ମୋଟରସାଇକେଲ ଯୋଗେ ବାଲିଗୁଡ଼ା ଅଭିମୁଖେ ଫେରୁଥିବା ସମୟରେ ରାଇକିଆ ଥାନା ରାମମୁଣ୍ଡା ନିକଟସ୍ଥ ବୁଲାଣି ରାସ୍ତାରେ ମୋଟରସାଇକେଲ ଦୁର୍ଘଟଣା ଘଟି ଗୁରୁତର ଆହତ ହୋଇ ରାସ୍ତାରେ ପଡ଼ିଥିଲେ । ଘଟଣା ସମ୍ପର୍କରେ ରାଇକିଆ ପୋଲିସ୍ ଖବରପାଇ ଘଟଣାସ୍ଥଳରେ ପହଁଚି ଦଣ୍ଡପାଣିଙ୍କୁ ଉଦ୍ଧାର କରି ରାଇକିଆ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରାଇଥିଲେ କିନ୍ତୁ ସେଠାରେ ଡାକ୍ତର ଦଣ୍ଡପାଣିଙ୍କୁ ମୃତ ଘୋଷଣା କରିଥିବା ଜଣାପଡ଼ିଛି । ସେପଟେ ରାଇକିଆ ପୋଲିସ୍ ଘଟଣାର ତଦନ୍ତ ଆରମ୍ଭ କରିଥିବା ବେଳେ କୌଣଶି ଅଜଣା ଗାଡ଼ି ଧକ୍କାରେ ଦଣ୍ଡପାଣିଙ୍କ ମୃତ୍ୟୁ ଘଟିଥିବା ଅନୁମାନ କରାଯାଉଛି ।
