ଚମ୍ପୁଆ : ଚମ୍ପୁଆ ଥାନା ଅନ୍ତର୍ଗତ କୃଷ୍ଣପୁର ଠାରେ ଆଜି ଏକ ଘର ମଧ୍ୟରୁ ଜଣେ ଯୁବକର ମୃତଦେହ ଉଦ୍ଧାର କରାଯାଇଥିବା ବେଳେ ମୃତ ଯୁବକର ପରିବାର ପକ୍ଷରୁ ଏହା ଏକ ହତ୍ୟାକାଣ୍ଡ ବୋଲି ଅଭିଯୋଗ ହୋଇଛି । ସୂଚନା ଅନୁସାରେ ସାନନଈ ଗ୍ରାମର ଧୃବଚରଣ ପ୍ରଧାନଙ୍କ ପୁଅ ଦେବବ୍ରତ ପ୍ରଧାନଙ୍କ ମୃତ ଶରୀର କୃଷ୍ଣପୁର ଗ୍ରାମର ଏକ ଘର ମଧ୍ୟରେ ପଡିଥିବା ଦେଖିବାକୁ ମିଳିଥିଲା । ସ୍ଥାନୀୟ ବାସିନ୍ଦା ମାନେ ଏନେଇ ଧ୍ରୁବଚରଣଙ୍କୁ ଖବର ଦେବାରୁ ସେ ପୋଲିସକୁ ଖବର ଦେଇଥିଲେ । ଚମ୍ପୁଆ ପୋଲିସ ଘଟଣା ସ୍ଥଳରେ ପହଁଚି ଯୁବକ ମୃତ୍ୟୁର କାରଣ ଅନୁସନ୍ଧାନ କରିଥିଲେ । ଏହା ସହିତ ସାଇଁଟିଫିକ୍ ଟିମ୍ ଘଟଣା ସ୍ଥଳରେ ପହଁଚି ଛାନବିନ କରିଥିଲେ । ପରେ ଦେବବ୍ରତ ପ୍ରଧାନର ମୃତ ଶରୀରକୁ ଚମ୍ପୁଆ ଡାକ୍ତରଖାନା ପୋଷ୍ଟମଟମ କରାଯାଇଥିଲା । ଏ ନେଇ ପୋଲିସ କେସ ନମ୍ବର ୧୦୧/୨୦୨୩ ରୁଜୁ କରି ଘଟଣାର ତଦନ୍ତ ଆରମ୍ଭ କରିଥିବା ବେଳେ କାହାକୁ ଗିରଫ କରାଯାଇନଥିବା ଭାରପ୍ରାପ୍ତ ଥାନା ଅଧିକାରୀ ଶାନ୍ତନୁ କୁମାର ଜେନା ସୂଚନା ଦେଇଛନ୍ତି । ପୋଷ୍ଟମଟମ ରିପୋର୍ଟ ଆସିଲା ପରେ ମୃତ୍ୟୁର କାରଣ ଜଣାପଡିବ ବୋଲି କହିଛନ୍ତି ।
