ଫୁଲବାଣୀ: କନ୍ଧମାଳ ଜିଲ୍ଲାର କାର୍ଯ୍ୟରତ ସମସ୍ତ ଅଙ୍ଗନବାଡି କର୍ମୀ ଆଜି କନ୍ଧମାଳ ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଶତାଧିକ ଅଙ୍ଗନବାଡି କର୍ମୀମାନେ ଧାରଣାରେ ବସିଛନ୍ତି । କାରଣ ରାଜ୍ୟରେ କାର୍ଯ୍ୟରତ ଅଙ୍ଗନବାଡି କର୍ମୀମାନେ ୨୦୨୧ କୋଭିଡ ମହାମାରୀ ଭଳି ସମୟରେ ନିଜ ଜୀବନକୁ ବାଜି ଲଗେଇ ସରକାରଙ୍କର କୋଭିଡ କାର୍ଯ୍ୟକ୍ରମକୁ ଘର ଘର ବୁଲି ଲୋକଙ୍କୁ ସଚେତନ କରିବା ସହିତ କରୋନା ରୋଗୀ ଚି଼ହ୍ନଟ ଭଳି ଗୁରୁ ଦାୟିତ୍ୱ ତୁଲାଇ ଥିଲେ । ହେଲେ ସରକାର ଘୋଷଣା କରିଥିବା କରୋନା ଯୋଦ୍ଧା ସହାୟତା ରାଶି ଆଜି ପର୍ଯ୍ୟନ୍ତ ସେମାନଙ୍କୁ ମିଳିନ ଥିବା ଅଭିଯୋଗ ଆସିଛି । ଅଙ୍ଗନବାଡିମାନଙ୍କ ବହୁ ସମସ୍ୟା ସରକାରଙ୍କୁ ବାରମ୍ବାର ଜଣାଇ ଥିଲେ ମଧ୍ୟ ଆଜି ସୁଦ୍ଧା ସରକାର ଅଙ୍ଗନବାଡି କର୍ମୀ ମାନଙ୍କ ଦାବିକୁ ଅଣଦେଖା କରିଚାଲିଛନ୍ତି । ତେଣୁ ଭାରତୀୟ ମଜଦୁର ସଙ୍ଘ ଦ୍ୱାରା ପରିଚାଳିତ ଅଲ ଓଡିଶା ଅଙ୍ଗନବାଡି ଲେଡିଜ ୱାର୍କସ ଆସୋଏସେସନର ନିଷ୍ପତ୍ତି କ୍ରମେ ନଭେମ୍ବର ୨୧ ତାରିଖ ଠାରୁ ସାରା ଓଡ଼ିଶାରେ କାର୍ଯ୍ୟ ବନ୍ଦ ଆନ୍ଦୋଳନ କରାଯିବା ସହିତ ବିଧାନସଭା ସମ୍ମୁଖରେ ଗଣ ଧାରଣା ବିକ୍ଷୋଭ ପ୍ରଦର୍ଶନ କରାଯିବା ପାଇଁ ନିଷ୍ପତ୍ତି ଗ୍ରହଣ କରାଯାଇଛି । ତଦନୁଯାଇ ରାଜ୍ୟର ପ୍ରତ୍ୟେକ ଜିଲ୍ଲାର ସଦର ମହଜୁମାରେ ମଧ୍ୟ ଅଙ୍ଗନବାଡି କର୍ମୀମାନେ ଦାବୀ ପୂରଣ ନ ହେବା ପର୍ଯ୍ୟନ୍ତ ଧାରଣାରେ ବସିବେ ବୋଲି କନ୍ଧମାଳ ଜିଲ୍ଲା ଅଙ୍ଗନବାଡି ଆସୋସିଏସନର ସଭାନେତ୍ରୀ ଗଣ ମାଧ୍ୟମକୁ କହିଛନ୍ତି । ଅଙ୍ଗନବାଡି ଆସୋସିଏସନର ଦାବୀ ଗୁଡିକ ହେଲା ଅଙ୍ଗନବାଡି କର୍ମୀମାନଙ୍କୁ ସରକାରୀ କର୍ମଚାରୀ ଭାବେ ଘୋଷଣା କରିବା, ଅଙ୍ଗନବାଡି କର୍ମୀମାନଙ୍କୁ ମାସିକ ୧୮,୦୦୦/- ଟଙ୍କା ଓ ସହାୟିକା ମାନଙ୍କୁ ମାସିକ ୧୦, ୦୦୦ ଟଙ୍କା ହାରରେ ଦରମା ପ୍ରଦାନ କରିବା, ମିନି ଅଙ୍ଗନବାଡି କର୍ମୀମାନଙ୍କୁ ମଧ୍ୟ ଅଙ୍ଗନବାଡି କର୍ମୀ ଭାବେ ଘୋଷିତ କରିବା, ଅଙ୍ଗନବାଡି କର୍ମୀମାନଙ୍କର ଏପିଏଫ, ଗ୍ରାଚ୍ୟୁଇଟି, ଇଏସ୍ଆଇସି ଲାଗୁକରିବା, ସରକାରଙ୍କର ନୂତନ ଶିକ୍ଷା ନୀତି ଆୟୋଗ ଅନୁଯାଇ ଯୋଗ୍ୟ ବିବେଚିତ ଅଙ୍ଗନବାଡି କର୍ମୀମାନଙ୍କୁ ବୟସ ସୀମା ରେଖାକୁ ଉଚ୍ଛେଦ କରି ପ୍ରି ପ୍ରାଇମେରୀ ଶିକ୍ଷୟତ୍ରୀ ଭାବେ ଶିକ୍ଷାନୁଷ୍ଠାନ ମାନଙ୍କରେ ନିଯୁକ୍ତି ପ୍ରଦାନ କରିବା, ବରିଷ୍ଠତା ଭିତ୍ତିରେ ସହାୟିକାମାନଙ୍କୁ ଅଙ୍ଗନବାଡି କର୍ମୀ ଭବେ ପଦୋନ୍ନତି ଦେବା, ୫୦% ସିଧା ସଳଖ ଅଙ୍ଗନବାଡି ସୁପରଭାଇଜର ନିଯୁକ୍ତି ବଦଳରେ ବରିଷ୍ଠତା ଓ ଶିକ୍ଷାଗତ ଯୋଗ୍ୟତା ଥିବା ଅଙ୍ଗନବାଡି କର୍ମୀମାନଙ୍କୁ ସୁପରଭାଇଜର ଭାବେ ପଦୋନ୍ନତି ଦେବା ଭଳି ପ୍ରମୁଖ ଦାବୀ ସମୂହ ସରକାରଙ୍କ ନିକଟରେ ରଖାଯାଇଥିବା ବିଷୟରେ କନ୍ଧମାଳ ଅଙ୍ଗନବାଡି ଆସୋସିଏସନର ସଭାନେତ୍ରୀ ଆରତୀ ବେହେରା ଓ ସାଧାରଣ ସମ୍ପାଦିକା ଯୁବତୀ ପ୍ରଧାନ ପ୍ରକାଶ କରିଛନ୍ତି । ସରକାର ଅଲ ଓଡିଶା ଅଙ୍ଗନବାଡି ୱାର୍କସ ଲେଡିଜ ଆସୋସିଏସନର ଦାବୀ ସମୂହ ପୂରଣ ନ କରିବା ପର୍ଯ୍ୟନ୍ତ ଏଭଳି ଗଣଧାରଣା, ବିକ୍ଷୋଭ ମାନ ଜାରି ରହିବ ବୋଲି ଗଣମାଧ୍ୟମ ନିକଟରେ ସଭାନେତ୍ରୀ ଆରତୀ ବେହେରା ପ୍ରକାଶ କରିଛନ୍ତି ।
