ହରଭଙ୍ଗା :ହରଭଙ୍ଗା ବ୍ଲକ ଅନ୍ତର୍ଗତ ଚାରିଛକ ଉଚ୍ଚ ପ୍ରାଥମିକ ବିଦ୍ୟାଳୟଠାରେ ବିଦ୍ୟାଳୟ ଛାତ୍ରୀ ମାନଙ୍କର “ରାଣୀ ଲକ୍ଷ୍ମୀବାଈ ଆତ୍ମ ସୁରକ୍ଷା ତାଲିମ’ ଶିବିର ଆଜି ଉଦଘାଟିତ ହୋଇଛି । ଏହି ତାଲିମ ଶିବିରକୁ ବିଦ୍ୟାଳୟ ପ୍ରଧାନଶିକ୍ଷକ ନିର୍ମଳ କୁମାର ରଣା ଉଦଘାଟନ କରିଥିବା ବେଳେ ହାଇସ୍କୁଲର ବରିଷ୍ଠ ଶିକ୍ଷକ ଶ୍ରୀଧର ପ୍ରଧାନ, ବାଣୀଭୂଷଣପୁର ସିଆରସିସି ହରମୋହନ ଦନାୟକ ସମ୍ମାନିତ ଅତିଥି ଭାବେ ଯୋଗଦାନ କରିଥିଲେ । ବିଦ୍ୟାଳୟ ଶିକ୍ଷା ସହ ବାଳିକାମାନଙ୍କ ଆତ୍ମରକ୍ଷା, ଦୃଢ଼ ମନୋବଳ ବୃଦ୍ଧି ଏବଂ ନିଜର ଆତ୍ମସମ୍ମାନ ରକ୍ଷା ପାଇଁ ପ୍ରତିକୂଳ ପରିସ୍ଥିତିକୁ କିପରି ସାମ୍ନା କରିବାକୁ ହେବ ସେ ସମ୍ପର୍କରେ ଆଲୋଚନା କରାଯିବା ସହ ତାଲିମ ପ୍ରଦାନ କରାଯାଇଥିଲା । ତାଲିମ ଶିବିରରେ ମୁଖ୍ୟ ତାଲିମଦାତା ଭାବେ ଶିକ୍ଷୟତ୍ରୀ ସରିତା ବିଶୋଇ ଏବଂ ଶୁଭଶ୍ରୀ ବରାଳ ଯୋଗ ଦେଇଥିଲେ । ଏହି ଶିବିରରେ ପଞ୍ଚାବନ ଜଣ ଛାତ୍ରୀ ଭାଗ ନେଉଥିବା ବେଳେ ତାଲିମ ଆସନ୍ତା ପାଞ୍ଚ ଦିନ ଧରି ଚାଲିବ ପ୍ରଧାନ ଶିକ୍ଷକ ଶ୍ରୀ ରଣା ସୂଚନା ଦେଇଛନ୍ତି ।
