ଘୁ.ଉଦୟଗିରି : ସ୍ଥାନୀୟ ସହରର ସବୁଠାରୁ ଜନଗହଳିପୂର୍ଣ୍ଣ ସ୍ଥାନ ଗାନ୍ଧୀ ଛକଠାରୁ ମାତ୍ର କିଛି ମିଟର ଦୂର ଓ ଥାନା ଠାରୁ ମାତ୍ର ୫୦୦ ମିଟର ଦୂରରେ ଅବସ୍ଥିତ ବଡ଼ସାହିରୁ ଗତ ରାତିରେ ଏକ ଯାତ୍ରୀବାହୀ ଅଟୋ ନମ୍ବର ଓଡି ୧୨ସି ୪୫୯୭ ଚୋରି ହୋଇଥିବା ଅଭିଯୋଗ ହୋଇଛି । ପ୍ରାପ୍ତ ସୂଚନା ଅନୁସାରେ ବଡ଼ସାହି ନିବାସୀ ଜିତୁ ସେଠୀଙ୍କ ଘରକୁ ଫୁଲବାଣୀରୁ ତାଙ୍କ ଶଳା ସାମନ୍ତ ବେହେରା ନିଜର ଅଟୋ ନେଇ ଆସିଥିଲେ । ଯାହାକୁ ସେ ରାତିରେ ଭିଣୋଇ ଜିତୁ ସେଠୀଙ୍କ ଘର ସାମ୍ନାରେ ରଖିଥିଲେ । ଯାହାକୁ କିଛି ଦୁର୍ବୃତ୍ତ ଚୋରି କରିନେଇଥିବା ନେଇ ସ୍ଥାନୀୟ ଥାନାରେ ଲିଖିତ ଏତଲା ଦେଇଥିବା ସୂଚନା ମିଳିଛି । ଏହା ସହ ଶ୍ରୀରାମ ପଦାରୁ ମଧ୍ୟ ଓ ଡି ୧୨ ଏ ୩୧୬୫ ନମ୍ବର ଅଟୋ ଚୋରି ଉଦ୍ୟମ ଘଟଣା ସାମ୍ନାକୁ ଆସିଛି କିନ୍ତୁ ସୌଭାଗ୍ୟ ବଶତଃ ଚୋର ମାନେ ଅଟୋଟିକୁ ନେଇ ନ ପାରି ଶିବ ମନ୍ଦିର ସମ୍ମୁଖ ରାସ୍ତା କଡ଼ରେ ଛାଡ଼ିଦେଇଥିବା ବିଶ୍ୱସ୍ତ ସୂତ୍ରରୁ ସୂଚନା ମିଳିଛି । ଗୋଟିଏ ରାତିରେ ଦୁଇଟି ସ୍ଥାନ ଶ୍ରୀରାମ ପଦା ଓ ଜନଗହଳି ପୂର୍ଣ୍ଣ ବଡ଼ଦାଣ୍ଡ ସାହି ଯାହା ଥାନାର ଅତିନିକଟ ସ୍ଥାନରୁ ଅଟୋ ଚୋରି ହେବା ଘଟଣା ସାଧାରଣରେ ପୋଲିସର ପେଟ୍ରୋଲିଙ୍ଗ ବ୍ୟବସ୍ଥା ଉପରେ ଜନସାଧାରଣଙ୍କ ମନରେ ପ୍ରଶ୍ନବାଚୀ ସୃଷ୍ଟି କରିବା ସହ ପୋଲିସ ପ୍ରତି ଚୋରଙ୍କ ଭୟନଥିବା ସ୍ପଷ୍ଟ ବାରିହେଉଛି । ଅଞ୍ଚଳର ଧନ ଜୀବନ ସୁରକ୍ଷିତ ରଖିବା ପୋଲିସର କର୍ତ୍ତବ୍ୟ । ତେଣୁ ବିଭାଗ ତରଫରୁ ରାତି ପେଟ୍ରୋଲିଙ୍ଗ ବ୍ୟବସ୍ଥାକୁ ଅଧିକରୁ ଅଧିକ କରିବା ପାଇଁ ସାଧାରଣରେ ଦାବି ହେଉଥିବା ଶୁଣିବାକୁ ମିଳୁଛି ।
