ଦଶପଲ୍ଲା : ନୟାଗଡ଼ ବନାଞ୍ଚଳର ନୟାଗଡ଼ ସେକ୍ସନ ଅଧିନସ୍ଥ ଚଣ୍ଡିବସ୍ତ ଗ୍ରାମରେ ଜୈନିକ ଶିକାରୀ ବାଘଛାଲ ବେପାର କରୁଥିବା ନେଇ ବନବିଭାଗ ପକ୍ଷରୁ ସୂଚନା ମିଳିଛି । ବନବିଭାଗ ଚଣ୍ଡୀବସ୍ତ ଗ୍ରାମର ଶିକାରୀ କୃପାସିନ୍ଧୁ ବିଶ୍ୱାଳକୁ ଗିରଫ କରିଛି । ତେବେ କୃପାସିନ୍ଧୁ ଜଣେ ପେଶାଦାର ଶିକାରୀ ବୋଲି ବନବିଭାଗ ଜାଣିବାକୁ ପାଇଥିଲା । ତାକୁ ଧରିବା ପାଇଁ ବନବିଭାଗ ଗତ କିଛିଦିନ ହେବ ଜାଲ ବିଛାଇ ଥିଲା । କୃପାସିନ୍ଧୁ ନୟାଗଡ଼-ଖଣ୍ଡପଡ଼ା ରାସ୍ତାରେ ଯାଉଥିବା ସମୟରେ ପାଣିପୋଇଲା ନିକଟସ୍ଥ ନିଟ୍ କଲେଜ ନିକଟରୁ ଗିରଫ କରିଥିଲେ । ତା ନିକଟରୁ ୭ ଫୁଟ ୩ ଇଞ୍ଚ ଲମ୍ବର ଏକ କରଡାପତରିଆ ବାଘଛାଲ ଜବତ କରିଥିଲା । ତଦନ୍ତ ସମୟରେ ଅଭିଯୁକ୍ତ ଠାରୁ ଶିକାର ପାଇଁ ବ୍ୟବହୃତ ଲୁହାତାର, ବନ୍ଧୁକ ବ୍ୟାରେଲ, ସିସା ଓ ବିସ୍ଫୋରକ ପ୍ରଭୃତି ଜବତ କରାଯିବା ସହ ଏକ ବାଇକ ମଧ୍ୟ ଜବତ କରାଯାଇଛି । ଅଭିଯୁକ୍ତ ଶିକାର ପାଇଁ ବ୍ୟବହାର କରୁଥିବା ବନ୍ଧୁକକୁ ବନବିଭାଗ ଜବତ କରିବାରେ ବିଫଳ ହୋଇଛି ।
