ବାଲିଗୁଡ଼ା:ରାଜ ରାସ୍ତାରେ ଗୋ ମାତାଙ୍କ ଜୀବନ ହାନି । ଗାଈଙ୍କ ସହ ମୋଟରସାଇକେଲ ମୁହାଁମୁହିଁ ଧକ୍କା ଫଳରେ ଚାରି ଗାଈଙ୍କ ମୃତ୍ୟୁ ଘଟିଥିବା ବେଳେ ଦୁଇ ମୋଟରସାଇକେଲ ଆରୋହୀ ଗୁରୁତର ଆହତ ହୋଇଥିବା ଜଣାପଡ଼ିଛି । ଏଭଳି ଘଟଣା ଦେଖିବାକୁ ମିଳିଛି କନ୍ଧମାଳ ଜିଲ୍ଲା ବାଲିଗୁଡ଼ା ଥାନା ଅନ୍ତର୍ଗତ ପରମପଙ୍ଗା ଗାଁ ନିକଟରେ । ଘଟଣା ପ୍ରକାରେ ଆଜି ଭୋର୍ ସକାଳୁ ୫୯ନଂ ଜାତୀୟ ରାଜପଥ ପରମପାଙ୍ଗା ଗାଁ ନିକଟରେ ରାଜପଥ ଉପରେ କିଛି ଗାଈ ଶୋଇଥିବା ବେଳେ ଗାଈଙ୍କ ସହ ଏକ ମୋଟରସାଇକେଲର ମୁହାଁମୁହିଁ ଧକ୍କା ହୋଇଥିଲା । ଦୁର୍ଘଟଣାରେ ଚାରୋଟି ଗାଈ ମୃତ୍ୟୁ ବରଣ କରିଥିବା ବେଳେ ଦୁଇ ମୋଟରସାଇକେଲ ଆରୋହୀ ଗୁରୁତର ଆହତ ହୋଇଥିଲେ । ଅଞ୍ଚଳବାସୀ ଦୁଇ ଗୁରୁତର ମୋଟରସାଇକେଲ ଆରୋହୀଙ୍କୁ ବାଲିଗୁଡ଼ା ଉପଖଣ୍ଡ ଚିକିତ୍ସାଳୟକୁ ପଠାଇଥିଲେ । ଆହତ ହୋଇଥିବା ଦୁଇ ମୋଟରସାଇକେଲ ଆରୋହୀ ରମାକାନ୍ତ ମାଝୀ ଓ ରମେଶ ମାଝୀ ହୋଇଥିବା ଜଣାପଡ଼ିଛି । ରାଜ ରାସ୍ତାରେ ଗାଈଗୋରୁ ଶୋଇରହୁଥିବା ବେଳେ ଏଭଳି ଘଟଣା ବାରମ୍ବାର ଘଟୁଥିବା ଦେଖିବାକୁ ମିଳୁଛି । କେତେବେଳେ ଗାଈ ତ ଆଉ କେତେବେଳେ ମଣିଷଙ୍କ ଜୀବନହାନୀ ଘଟୁଛି । ଜିଲ୍ଲା ପ୍ରଶାସନ ଏଥିପ୍ରତି ସ୍ୱତନ୍ତ୍ର ଦୃଷ୍ଟି ଦେଲେ ଗୋମାତାଙ୍କୁ ସୁରକ୍ଷା ଦେବାସହ ଜନସାଧାରଣଙ୍କ ଜୀବନ ବଞ୍ଚିପାରନ୍ତା ବୋଲି ବୁଦ୍ଧିଜିବୀମାନେ କହିଛନ୍ତି ।
