ମାଥିଲି: ମାଲକାନଗିରି ଜିଲ୍ଲା ମାଥିଲି ଥାନା ହଳଦୀକୁଣ୍ଡ ଗାଁରେ ଅଭାବନୀୟ ଘଟଣା । ନିଶାଶକ୍ତ ପୁଅର ଟାଙ୍ଗିଆ ଚୋଟରେ ବାପାଙ୍କର ମୃତ୍ୟୁ ଘଟିଛି । ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି ।
ଖବର ଅନୁଯାୟୀ, ହଳଦୀକୁଣ୍ଡ ଗାଁର ଗୁଜା କଓ୍ୱାସୀ ଓ ତାଙ୍କ ପୁଅ ଲକ୍ଷ୍ମୀ କବାସୀ ଘରେ ରହୁଥିଲେ । ପୁଅ ଲକ୍ଷ୍ମୀ କବାସୀ ମଦ ନିଶାରେ ଘରକୁ ଆସିଥିଲେ । ଯାହାକୁ ନେଇ ଉଭୟ ବାପା-ପୁଅଙ୍କ ମଧ୍ୟରେ ବଚସା ହୋଇଥିଲା । ଯେଉଁଥିରେ ପୁଅ ଲକ୍ଷ୍ମୀ ରାଗିଯାଇ ବାପା ଗୁଜାଙ୍କୁ ଟାଙ୍ଗିଆରେ ଆକ୍ରମଣ କରିଥିଲେ । ଯାହାଫଳରେ ଗୁଜାଙ୍କ ମୃତ୍ୟୁ ହୋଇଥିଲା । ସାମାନ୍ୟ ବଚସାରୁ ନିଜ ଜନ୍ମ କଲା ବାପାକୁ ହତ୍ୟା କରି ଘରେ ଲୁଚି ରହିଥିଲା ପୁଅ ।
ସେପଟେ ଖବର ପାଇ ମାଥିଲି ଥାନା ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି । ଏହାସହିତ ଏକ ସାଇଣ୍ଟିଫିକ୍ ଟିମ୍ ପହଞ୍ଚି ମଧ୍ୟ ତନାଘନା ଜାରି ରଖିଛି । ଘଟଣାସ୍ଥଳରେ ଏକ ଟାଙ୍ଗିଆ ଜବତ କରିବା ସହ ଅଭିଯୁକ୍ତ ପୁଅକୁ ଗିରଫ କରିଛି ପୋଲିସ । ଥାନାରେ ମାମଲା ରୁଜୁ କରିବା ସହ ଅଭିଯୁକ୍ତଙ୍କୁ କୋର୍ଟ ଚାଲାଣ କରିଛି ପୋଲିସ ।
