ବାଲିଗୁଡ଼ା: ବିଚ୍ ବଜାରରେ ଗଞ୍ଜେଇ ଭର୍ତ୍ତି କାରକୁ ଫିଲ୍ମ ଷ୍ଟାଇଲରେ ମାଡ଼ି ବସିଲା ପୋଲିସ୍ । ଗଞ୍ଜେଇ ଭର୍ତ୍ତି କାରକୁ ଜବତ କରିଥିବା ବେଳେ ଜଣେ ମାଫିଆକୁ ଗିରଫ କରିବାରେ ସକ୍ଷମ ହୋଇଛି ପୋଲିସ୍ । ଏଭଳି ରୋମାଞ୍ଚକର ଘଟଣା ଦେଖିବାକୁ ମିଳିଛି କନ୍ଧମାଳ ଜିଲ୍ଲା ବାଲିଗୁଡ଼ା ସହରରେ । ଘଟଣା ପ୍ରକାରେ ବାଲିଗୁଡ଼ା ଥାନା ଅଧିକାରୀ ବାବାଶଙ୍କର ସରାଫଙ୍କ ନେତୃତ୍ୱରେ ଏକ ଟିମ୍ ପେଟ୍ରୋଲିଂ କରୁଥିବା ସମୟରେ ଗଞ୍ଜେଇ ଚୋରାଚାଲାଣ ହେବା ନେଇ ସୂଚନା ପାଇଥିଲା । ଆଜି ସକାଳେ ପ୍ରାୟ ୮ଟା ୩୦ ମିନିଟ୍ ସମୟରେ ବାଲିଗୁଡ଼ା ବସ୍ ଷ୍ଟାଣ୍ଡ୍ ନିକଟସ୍ଥ ବୁଡାଗୁଡ଼ା ଛକ ନିକଟରେ ଗଞ୍ଜେଇ ଭର୍ତ୍ତି କାର୍ ଦ୍ରୁତ ଗତିରେ ଯାଉଥିବା ବେଳେ ପୂର୍ବରୁ ପୋଲିସ ପକ୍ଷରୁ ଏକ ପିକ୍ ଅପ୍ ଭ୍ୟାନ୍ ସେଠାରେ ଜଗି ରହିଥିଲା । ଗଞ୍ଜେଇ ଭର୍ତ୍ତି କାରକୁ ଅଟକାଇବା ବେଳେ ପିକ୍ ଅପ୍ ଭ୍ୟାନକୁ ପଛପଟୁ ଧକ୍କା ଦେଇଥିଲା । ପିକ୍ ଅପ୍ ଭ୍ୟାନକୁ ଧକ୍କା ଦେଇ ମାଫିଆ ଫେରାର୍ ହେବାକୁ ଚେଷ୍ଟା କରିବାବେଳେ ରାସ୍ତା ଉପରେ ମାଡ଼ି ବସିଲା ପୋଲିସ୍ । ଘଟଣାରେ ଜଣେ ପୋଲିସ୍ କର୍ମଚାରୀ ଆହତ ହୋଇଥିବା ପୋଲିସ୍ ପକ୍ଷରୁ ସୂଚନା ମିଳିଛି । ସେପଟେ ସମ୍ପୃକ୍ତ ହୋଣ୍ଡା କାର୍ରୁ ୩୫ କେଜି ବେଆଇନ୍ ଗଞ୍ଜେଇ ପୋଲିସ୍ ଜବତ କରିଥିବା ଜଣାପଡ଼ିଛି । ଗିରଫ ମାଫିଆ ଜଣକ ଗଞ୍ଜାମ ଜିଲ୍ଲା ଗାଙ୍ଗପୁର ଅଞ୍ଚଳର ସତ୍ୟଜିତ୍ ପାଣିଗ୍ରାହୀ ହୋଇଥିବା ପୋଲିସ୍ ସୂତ୍ରରୁ ସୂଚନା ମିଳିଛି । ଏନେଇ ବାଲିଗୁଡ଼ା ଥାନା କେସ୍ ନଂ ୭୪/୨୦୨୩ରେ ଏକ ମାମଲା ରୁଜୁ କରି ତଦନ୍ତ ଜାରି ରଖିଛି ପୋଲିସ୍ ।
