ଘୁ.ଉଦୟଗିରି: ସ୍ଥାନୀୟ ବ୍ଲକ ରଟିଙ୍ଗିଆ ପଞ୍ଚାୟତ ଡକେଡି ଗ୍ରାମରୁ ସ୍ୱାମୀକୁ ହତ୍ୟା ଅଭିଯୋଗରେ ସ୍ତ୍ରୀ ସବିତା ନାୟକ(୪୬) କୁ ଘୁ.ଉଦୟଗିରି ପୋଲିସ ସହାୟତାରେ ଗୁଜରାଟ, ଜିଲ୍ଲା ସୁରାଟ(ସଦର) କୋସାମ୍ବା ଥାନା ପୋଲିସ ଝିଅ ସୁନୀତା ନାୟକ ( ୧୯) ଓ ଅନ୍ୟ ଜଣେ ନାବାଳିକା ଝିଅ କୁ ଗିରଫ କରିଛି । ସୂଚନା ଅନୁସାରେ ମୃତ ନରେଶ ନାୟକ ନିଜ ଘର ରଟିଙ୍ଗିଆ, ଡକେଡି ଓ ସ୍ତ୍ରୀ ସବିତା ନାୟକ ଗ୍ରାମ ବଡ଼ ଡାକପଲା ପଞ୍ଚାୟତ ରାଇକଲାର ଦମ୍ପତି ଗୋଟିଏ ୧୯ ବର୍ଷ ଓ ଅନ୍ୟ ଜଣେ ନାବାଳିକା ଝିଅଙ୍କ ସହ ବିଗତ ପ୍ରାୟ ୨୫/୩୦ ବର୍ଷ ହେବ ସୁରାଟର ପିପଦରା ଅଞ୍ଚଳର ଉମଙ୍ଗ ରେସିଡେନ୍ସି ଘର ନମ୍ବର ୨୧୦ ରହି ଦାଦନ ଖଟି ଚଳୁଥିଲେ । କିନ୍ତୁ କିଛିଦିନ ହେବ ଉଭୟଙ୍କ ମଧ୍ୟରେ ଅଶାନ୍ତି କାରଣରୁ ପାଟିଦୁଣ୍ଡ ହେଉଥିଲା । ଚଳିତ ମାସ ୨ ତାରିଖ ପରେ ନରେଶ ଓ ତାଙ୍କ ପରିବାରକୁ ସାହି ପଡ଼ିଶା ଲୋକେ ସେମାନେ ରହିଥିବା ଘରେ ଦେଖି ପାରିନଥିଲେ । କିନ୍ତୁ ଘର ଠାରୁ କିଛି ଦୂରରେ ଆଖାରେ ବନ୍ଧା ହୋଇ ପଡ଼ିଥିବା ନରେଶର ମୃତ ଶରୀର ସାହି ପଡିଶା ଲୋକେ ଦେଖିବା ପରେ ହତ୍ୟା ସନ୍ଦେହ କରି ତାଙ୍କ ଭାଇ ମୁନା, ଏମଡି ୟାକୁବ୍, ଏମଡି ୟାଜିସ ସ୍ଥାନୀୟ ପୋଲିସ କୁ ଲିଖିତ ଅଭିଯୋଗ ଦେଇଥିଲେ । ପୋଲିସ ଘଟଣା ସ୍ଥଳରେ ପହଞ୍ଚି ମୃତ ଶବକୁ ଜବତ କରିବା ସହ ବ୍ୟବଛେଦ କରି ତଦନ୍ତ କରିବା ସହ ଧାରା ୩୦୨,୨୦୧ ଓ ୧୧୪ ଆଧାରରେ ସ୍ତ୍ରୀ ସବିତା ନାୟକ, ଝିଅ ସୁନିତା ନାୟକ ଓ ନାବାଳିକା ସାନ ଝିଅକୁ ଘୁ.ଉଦୟଗିରି ପୋଲିସ ସହାୟତାରେ ଗିରଫ କରିଥିବା ଜଣାପଡିଛି । ଗିରଫ ମାନଙ୍କୁ ସ୍ଥାନୀୟ କୋର୍ଟ ଚାଲାଣ ପରେ ସୁରଟ ପୋଲିସ ରିମାଣ୍ଡରେ ନେବାକୁ ଆବେଦନ କରିଥିବା ସୂଚନା ମିଳିଛି ।
