ବୌଦ୍ଧ : ବୌଦ୍ଧ ଜିଲ୍ଲାରେ ଦୁଇଟି “ମିଶନ ଶକ୍ତି କାଫେ’ର ଶୁଭାରମ୍ଭ ପଞ୍ଚାୟତିରାଜ ଓ ଜଙ୍ଗଲ ପରିବେଶ ବିଭାଗ ମନ୍ତ୍ରୀ ପ୍ରଦୀପ ଅମାତ କରିଛନ୍ତି । ଏହି ଅବସରରେ କଣ୍ଟାମାଳ ବିଧାୟକ ମହୀଧର ରଣା, ଜିଲ୍ଲାପାଳ ଲଲାଟେନ୍ଦୁ ମିଶ୍ର ମଧ୍ୟ ଉପସ୍ଥିତ ଥିଲେ । ଶୁଭାରମ୍ଭ ହୋଇଥିବା ଦୁଇଟି କାଫେ ମଧ୍ୟରୁ ଗୋଟିଏ ଗଜରାଜପୁର ଓ ଅନ୍ୟଟି ମହାନଦୀ ବିହାର ପାର୍କ ଠାରେ ରହିଛି । ଏହି ମିଶନ ଶକ୍ତି କାଫେ ଏସଏଚଜିର ମହିଳା ସଦସ୍ୟାମାନଙ୍କ ଦ୍ୱାରା ପରିଚାଳିତ ହେବ ଏବଂ ଏଥିରେ ସୁସ୍ୱାଦୁ ଭୋଜନ ଜଳଖିଆ ଓ ଚା କଫିର ବ୍ୟବସ୍ଥା ରହିବ । ଗଜରାଜପୁର କାଫେର ଉଦ୍ଘାଟନୀ ଉତ୍ସବ ମୁଖ୍ୟ ବିକାଶ ଅଧିକାରୀ, ଜିଲ୍ଲା ପରିଷଦ ସଭାପତି, ବୌଦ୍ଧ ବିଡ଼ିଓ, ମନୁପାଲି ସରପଞ୍ଚ, ମିଶନ ଶକ୍ତି ଡିପିସି, ଡିପିଏମ ମିଶନ ଶକ୍ତି ଓ ବ୍ଲକ ସ୍ତରୀୟ ଅଧିକାରୀ ଗଣ ତଥା ବ୍ଲକ ସ୍ତରୀୟ ମହାସଂଘର ସଦସ୍ୟା ମାନେ ଉପସ୍ଥିତ ଥିଲେ । ଏହା ବ୍ୟତୀତ ସ୍ଥାନୀୟ ଏସଏଚଜିର ମହିଳା ମାନେ ଓ ଗ୍ରାମବାସୀଗଣ ଉପସ୍ଥିତ ଥିଲେ । ସେହିପରି ମହାନଦୀ ବିହାର ପାର୍କ ମିଶନ ଶକ୍ତି କାଫେର ଉଦଘାଟନୀ ଉତ୍ସବରେ ଜିଲ୍ଲା ସ୍ତରୀୟ ସମସ୍ତ ଅଧିକାରୀ ଓ ବିଜ୍ଞାପିତ ଅଂଚଳ ପରିଷଦର ଅଧିକାରୀ ଉପସ୍ଥିତ ଥିଲେ । ଏସଏଚଜି ମା ମାନଙ୍କ ଦ୍ୱାରା ପ୍ରସ୍ତୁତ ସୁସ୍ୱାଦୁ ପିଠା ଓ ଜଳଖିଆ ସମସ୍ତ ଅତିଥିଗଣ ଓ ସର୍ବସାଧାରଣରେ ବଣ୍ଟନ କରାଯାଇଥିଲା ।
