ଖପ୍ରାଖୋଲ : ଖପ୍ରାଖୋଲ ଥାନା ପୁଲିସ ଚଢାଉ କରି ମୋଟର ସାଇକେଲରେ ଚାଲାଣ ହେଉଥିବା ୫ ଜଣ ଦାଦନ ଶ୍ରମିକକୁ ଉଦ୍ଧାର କରିବା ସହ ଜଣେ ଦଳାଲକୁ ଗିରଫ କରିଛି । ଗିରଫ ଅଭିଯୁକ୍ତ ଜଣକ ହେଲେ ସାନ ଉଡେନ୍ ଗାଁର ଦାଦନ ସର୍ଦ୍ଦାର ଘନଶ୍ୟାମ ଜାଲ । ମିଳିଥିବା ରିପୋର୍ଟ ମୁତାବକ, ଖପ୍ରାଖୋଲ ପୁଲିସ ସକାଳେ ପେଟ୍ରୋଲିଙ୍ଗ କରିବା ସମୟରେ ମୋଟର ସାଇକେଲରେ ଯାଉଥିବା କିଛି ଲୋକଙ୍କୁ ଅଟକାଇ ପଚରାଉଚୁରା କରିଥିଲେ । ଶ୍ରମିକଙ୍କୁ ଦାଦନ ସର୍ଦ୍ଦାର ଘନଶ୍ୟାମ ଚାଲାଣ କରୁଥିବା ଜାଣି ସେମାନଙ୍କୁ ଉଦ୍ଧାର କରି ନିଜ ଗାଁକୁ ପଠେଇ ଦେଇଥିଲେ । ଏନେଇ ଖପ୍ରାଖୋଲ ଥାନାରେ ଏକ ମାମଲା ରୁଜୁ କରି ଦାଦନ ଦଲାଲକୁ କୋର୍ଟ ଚାଲାଣ କରାଯାଇଛି ବୋଲି ଥାନାଧିକାରୀ ରମାକାନ୍ତ ସାହୁ ପ୍ରକାଶ କରିଛନ୍ତି ।
