ହରଭଙ୍ଗା : ଷଷ୍ଠ ରାଜ୍ୟସ୍ତରୀୟ ଫୁଟବଲ ଟୁର୍ଣ୍ଣାମେଣ୍ଟ ୨୦୨୪ ହରଭଙ୍ଗା ବ୍ଲକ ରାମଗଡ ଗ୍ରାମପଞ୍ଚାୟତ ପ୍ରଗଳପୁର ତସରା ପଡିଆ ଠାରେ ମୁଖ୍ୟ ଅତିଥିଭାବେ ବୌଦ୍ଧ ଜିଲ୍ଲା ଫୁଟବଲ ଆସୋସିଏସନ ଓ କ୍ରିକେଟ ଆସୋସିଏସନର ସମ୍ପାଦକ ତଥା ଦୈନିକ ହୀରାଞ୍ଚଳ ଖବର କାଗଜର ସମ୍ପାଦକ ଯୁଗଳ କିଶୋର ସାମଲ ଉପସ୍ଥିତ ରହି ଟୁର୍ଣ୍ଣାମେଣ୍ଟର ଉଦଘାଟନ କରିଥିଲେ । ବୁଦ୍ଧଦେବ କ୍ଳବ ପ୍ରଗଳପୁର ଦ୍ୱାରା ଆୟୋଜିତ ଏହି ଷଷ୍ଠ ରାଜ୍ୟସ୍ତରୀୟ ଫୁଟବଲ ଟୁର୍ଣ୍ଣାମେଣ୍ଟରେ ଜିଏମସି ବୌଦ୍ଧ, ସୋନପୁର ଜୟଦୁର୍ଗା କ୍ଳବ, ପ୍ରଗଳପୁର ବୁଦ୍ଧଦେବ କ୍ଳବ, ଜି ଉଦୟଗିରି ଚକାଡୋଳା କ୍ଳବ, ଡିଡିଏ ଅନଗୁଳ, ଭଞ୍ଜନଗର ଭୈରବୀ କ୍ଳବ, ଡିଡିଏ ଫୁଲବାଣୀ, ଆଇଆରବି ବୌଦ୍ଧ ଭାଗ ନେଇଥିବା ବେଳେ ଉଦଘାଟନୀ ମ୍ୟାଚରେ ଜିଏମସି ବୌଦ୍ଧ ସହିତ ଜୟଦୁର୍ଗା କ୍ଳବ ସୋନପୁର ମଧ୍ୟରେ ଖେଳ ଅନୁଷ୍ଠିତ ହୋଇଥିଲା ।
ମଧ୍ୟାନ୍ତର ପୂର୍ବରୁ ଉଭୟ ଦଳ ଗୋଟିଏ ଗୋଟିଏ ଗୋଲ ସ୍କୋର କରି ସମାନ ସ୍ଥିତିରେ ରହିଥିଲେ । ନିର୍ଦ୍ଧାରିତ ସମୟ ଭିତରେ ସୋନପୁର ୩-୨ଗୋଲରେ ବିଜୟୀ ହୋଇଥିଲେ । ଆଜିର ଉଦଘାଟନୀ ଦିବସରେ ସମ୍ମାନିତ ଅତିଥିଭାବେ ପୂର୍ବତନ ସରପଞ୍ଚ ନରେଶ ସେଠି, ସୁଜିତ କର୍ଣ୍ଣ ଓ ବିରେନ କର୍ଣ୍ଣ ଉପସ୍ଥିତ ରହି ଖେଳାଳିଙ୍କୁ ଉତ୍ସାହିତ କରିଥିଲେ । ଆଜିର ମ୍ୟାଚକୁ ମୁଖ୍ୟ ରେଫରି ସୁଜିତ ରାଜହଂସ ପରିଚାଳନା କରିଥିବା ବେଳେ ସୁଶୀଲ ବେହେରା, ପ୍ରତାପ ପ୍ରଧାନ, ସରୋଜ ମଲ୍ଲିକ ସହଯୋଗ କରିଥିଲେ । ଆଜିର ଖେଳକୁ ବୁଦ୍ଧଦେବ କ୍ଳବର ସମସ୍ତ ସଦସ୍ୟ ଓ ପ୍ରଗଳପୁର ଗ୍ରାମବାସୀ ସହଯୋଗ କରିଥିଲେ ।
