ହରଭଙ୍ଗା: ଘରୋଇ କଳହର କରୁଣ ପରିଣତି । ସ୍ୱାମୀର ଟାଙ୍ଗିଆ ଚୋଟରେ ସ୍ତ୍ରୀ ମୃତ । ବୌଦ୍ଧ ଥାନା ବୃନ୍ଦାବନ ଗ୍ରାମ ଟିକିରା ସାହିରେ ଘଟିଛି ଏଭଳି ଅଭାବନୀୟ ଘଟଣା । ସ୍ୱାମୀର ନାମ ସନାତନ ନାଗ । ମୃତ ସ୍ତ୍ରୀର ନାମ ଆମ୍ବୁତି ନାଗ । ଘଟଣା ସ୍ଥଳରୁ ସ୍ୱାମୀ ଫେରାର । ସୂଚନା ଅନୁଯାୟୀ ବୌଦ୍ଧ ଥାନା ସାମ୍ପୋଚ ପଞ୍ଚାୟତ ଅନ୍ତର୍ଗତ ବୃନ୍ଦାବନ ଗ୍ରାମର ସନାତନ ନାଗ ଓ ତାଙ୍କ ଦ୍ୱିତୀୟ ପତ୍ନୀ ଆମ୍ବୁତି ନାଗ ଦୀର୍ଘ ଦିନରୁ ରହି ଆସୁଥିଲେ । ତେବେ ଗ୍ରାମବାସୀଙ୍କ କହିବା ଅନୁଯାୟୀ ସନାତନ ପ୍ରତ୍ୟେକ ଦିନ ଅତ୍ୟଧିକ ମଦ୍ୟପାନ କରି ସ୍ତ୍ରୀଙ୍କ ସହ ଝଗଡା କରିବା ସହ ମାରପିଟ କରିଥାନ୍ତି । ତେବେ ଗତକାଲି ରାତିରେ ପ୍ରଚୁର ମଦ୍ୟପାନ କରି ପାରିବାରିକ ଘଟଣାକୁ ନେଇ ସ୍ତ୍ରୀକୁ ଏକ ଟାଙ୍ଗିଆରେ ଅତି ନିର୍ମମ ଭାବେ ହତ୍ୟା କରିଥିଲେ । ସ୍ତ୍ରୀଙ୍କ ଶରୀର ସାରା କ୍ଷତ ଥିବା ପୋଲିସ ପକ୍ଷରୁ ସୂଚନା ମିଳିଛି । ଅମୃତିଙ୍କ ବେକରେ କ୍ଷତାକ୍ତ ହେବା ସହ ମୃତ୍ୟୁ ହୋଇଥିଲା । ହତ୍ୟାକାଣ୍ଡ ଭିଆଇ ଘଟଣା ସ୍ଥଳରୁ ଫେରାର ମାରିଥିଲା ହତ୍ୟାକାରୀ ସ୍ୱାମୀ । ଖବର ପାଇ ବୌଦ୍ଧ ଆଦର୍ଶ ଥାନା ପୋଲିସ ଘଟଣା ସ୍ଥଳରେ ପହଞ୍ଚି ଛାନଭିନ ଜାରି ରଖିଛି ।
