ପୁରୀ : ଯୁବ ବିଜେଡ଼ି ନେତା ତଥା ବ୍ୟବସାୟୀ ସୋମନାଥ ସାହୁ ଓରଫ କପଙ୍କୁ ଗୁଳିମାଡ ହୋଇଥିବା ଜଣାପଡିଛି । ରେଡକ୍ରସ ରୋଡ ପାଣି ଗୋଦାମ ନିକଟରେ ଗୁଳିମାଡ ହୋଇଥିବା ଅଭିଯୋଗ । ତେବେ ଗୁଳିମାଡ ହୋଇଛି କି ଆକ୍ରମଣ ହୋଇଛି ତାହା ସ୍ପଷ୍ଟ ହୋଇନାହିଁ । ଆଜି ଅପରାହ୍ନରେ ୪ ଜଣ ସୋମନାଥଙ୍କ ଗୋଦାମ ନିକଟକୁ ଆସିଥିଲେ । ଦୁଇ ଜଣ ଦୁର୍ବୃତ୍ତ ବାହାରେ ଥିବାବେଳେ ଆଉ ଦୁଇ ଜଣ ଦୁର୍ବୃତ୍ତ ଭିତରକୁ ପଶି ଏଭଳି କାଣ୍ଡ ଭିଆଇଥିବା ପ୍ରାଥମିକ ତଦନ୍ତରୁ ଜଣାପଡ଼ିଛି । କପଙ୍କ ମୁଣ୍ଡରେ ଆଘାତ ଲାଗି ରକ୍ତସ୍ରାବ ହୋଇଥିଲା । ତୁରନ୍ତ ରକ୍ତ ଜୁଡୁବୁଡୁ ଅବସ୍ଥାରେ ସ୍ଥାନୀୟ ଲୋକେ ଓ ପରିବାର ଲୋକେ ତାଙ୍କୁ ସଦର ମୁଖ୍ୟ ଚିକିତ୍ସାଳୟ ଓଟିରେ ଭର୍ତ୍ତି କରାଇଥିଲେ । ପରେ ତାଙ୍କୁ ଆମ୍ବୁଲାନ୍ସ ଯୋଗେ ପୁରୀରୁ ଭୁବନେଶ୍ୱର ସ୍ଥାନାନ୍ତରିତ କରାଯାଇଛି । ଖବର ପ୍ରଚାର ହେବା ପରେ ହସ୍ପିଟାଲରେ ଶତାଧିକ ଲୋକେ ଏକତ୍ରିତ ହୋଇଥିଲେ । ଖବର ପାଇଁ କୁମ୍ଭାରପଡ଼ା ଥାନା ପୋଲିସ,ଅତିରିକ୍ତ ଏସପିଙ୍କ ସହ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛନ୍ତି । ଗୋଦାମରେ ବନ୍ଧୁକ ପଡ଼ିଥିବା ସୂଚନା ପାଇ ପୋଲିସ ଛାନଭିନ କରୁଛି ।
ଅତିରିକ୍ତ ଏସପି ସୁଶୀଲ ମିଶ୍ର ପ୍ରତିକ୍ରିୟା ଦେଇ କହିଛନ୍ତି ଗୁଳିକାଣ୍ଡ ହୋଇଛି କି ନାହିଁ ତାର ତଦନ୍ତ ଚାଲିଛି । ପ୍ରତ୍ୟକ୍ଷଦର୍ଶ ଓ ପଡୋଶୀଙ୍କୁ ପଚରାଉଚୁରା କରାଯାଉଛି । ସିସିଟିଭି ଫୁଟେଜ ଯାଞ୍ଚ କରାଯିବ । ସାଇଣ୍ଟିଫିକ ଟିମ୍ ଘଟଣାସ୍ଥଳରେ ପହଞ୍ଚି ତଦନ୍ତ କରୁଛି ।
