ଜହ୍ନାପଙ୍କ,୨୪/୫: ଆଉ ଅଧା ଘଣ୍ଟା ପରେ ପହଞ୍ଚିଥାନ୍ତେ ବାଉଁଶୁଣି ଥାନାରେ, କିନ୍ତୁ ବିଧାନ ଥିଲା ଅଲଗା । ନିମିଷକ ମଧ୍ୟରେ ୨ ଟି ମୂଲ୍ୟବାନ ଜୀବନ ଚାଲିଗଲା । ବୌଦ୍ଧ-ବଲାଙ୍ଗୀର ଜାତୀୟ ରାଜପଥ ନଂ ୫୭ର କମଳପୁର ଛକ ନିକଟରେ ଆଜି ଭୋର ପ୍ରାୟ ୪ ଟା ୧୦ ମିନିଟ ସମୟରେ ଏକ ଟ୍ରକ୍ ନଂ ଓଡ଼ି ୨୫ ଏମ ୦୦୯୫ ବୋଲେରୋ ନଂ ଓଡି ୦୩-ଇ ୫୧୬୩ ମୁହାଁମୁହିଁ ଧକ୍କା ହେବାରୁ ଘଟଣା ସ୍ଥଳରେ ୨ ଜଣଙ୍କର ମୃତ୍ୟୁ ହୋଇଥିବା ବେଳେ ୨ଜଣ ଗୁରୁତର ଭାବେ ଆହତ ହୋଇଛନ୍ତି । ସେହିପରି ଏହି ଦୁର୍ଘଟଣାରେ ଜଣେ ଆହତ ହୋଇଥିବା ଜଣାପଡିଛି । ମୃତକ ମାନେ ହେଲେ ବାଉଁଶୁଣୀ ଥାନାର ଜଣେ ପୋଲିସ୍ କର୍ମଚାରୀ ସହିତ ପ୍ରାଇଭେଟ ବୋଲେର ଡ୍ରାଇଭର । ଅନ୍ୟ ଦୁଇ ପୋଲିସ୍ କର୍ମଚାରୀ ଗୁରୁତର । କାର୍ଯ୍ୟରତ ହୋମଗାର୍ଡ ଜଗନ୍ନାଥ ମେହେର ଓ ବ୍ୟକ୍ତିଗତ ବୋଲେରୋ ଡ୍ରାଇଭର ପ୍ରଶାନ୍ତ ରଣା ବୋଲି ଜଣାପଡିଛି । ତୁରନ୍ତ ଗୁରୁତର ଆହତଙ୍କୁ ଆମ୍ବୁଲାନ୍ସ ଯୋଗେ ବୌଦ୍ଧ ଡାକ୍ତରଖାନାକୁ ନିଆଯାଇଥିଲା ।
ଆହତଙ୍କ ମଧ୍ୟରେ ଜଣେ ଏଏସଆଇ ନାଗରାଜ ପ୍ରଧାନ ଏବଂ ହୋମଗାର୍ଡ ସୁଶାନ୍ତ ସାହୁ ,ଆହତ ହୋମ୍ ଗାର୍ଡ ଉଦୟ ନାଥ ଜାନୀ ବୌଦ୍ଧ ଡାକ୍ତରଖାନାରେ ଚିକିତ୍ସିତ ହେଉଛନ୍ତି । ସୂଚନାମତେ କଟକରୁ ଏକ ରେସ୍କ୍ୟୁ ଅପରେସନ ସାରି ବାଉଁଶୁଣି ପୋଲିସ ନିଜ ଥାନାକୁ ଫେରୁଥିବା ବେଳେ ଏହି ମର୍ମନ୍ତୁଦ ଦୁର୍ଘଟଣା ଘଟିଥିଲା । ସୂଚନା ଅନୁଯାୟୀ ବୌଦ୍ଧ ଜିଲ୍ଲା ବାଉଁସୁଣି ଥାନାର ଏକ ଟିମ୍ କଟକ ଜିଲ୍ଲାରୁ ଏକ ରେସ୍କ୍ୟୁ ଅପରେସନ ସାରି ବ୍ୟକ୍ତିଗତ ବୋଲେରୋ ଗାଡ଼ିରେ ନିଜ ଥାନାକୁ ଫେରୁଥିବା ସମୟରେ ଜହ୍ନାପଙ୍କ ଫାଣ୍ଡି ଅନ୍ତର୍ଗତ କମଳପୁର ଛକ ନିକଟରେ ସୋନପୁର ଆଡୁ ଆସୁଥିବା ଏକ ସମ୍ବଲପୁରୀ ପଥର ବୋଝେଇ ଟ୍ରକ ସହିତ ମୁହାଁମୁହିଁ ଧକ୍କା ହୋଇଥିଲା । ଫଳରେ ଘଟଣା ସ୍ଥଳରେ ବୋଲେରୋଟି ଓଲଟିପଡ଼ି ଚୁରମାର ହୋଇଯାଇଥିବାବେଳେ ଟ୍ରକଟି ଡାହାଣ ପାର୍ଶ୍ୱରେ ଡ୍ରେନ କଡ଼ରେ ଅଣେଇ ରହିଛି । ତେବେ ଘଟଣା ସ୍ଥଳରେ ହିଁ ଜଣେ ପୋଲିସ୍ ହୋମଗାର୍ଡ ଏବଂ ବୋଲେରୋ ଡ୍ରାଇଭରଙ୍କ ମୃତ୍ୟୁ ହୋଇଯାଇଛି । ଜହ୍ନାପଙ୍କ ଫାଣ୍ଡି ଅଧିକାରୀ କୁମୁଦ ଚନ୍ଦ୍ର ଭୋଇ ଘଟଣା ସ୍ଥଳରେ ପହଞ୍ଚି ତଦନ୍ତ ଚଳାଇଛନ୍ତି । ଏ ଖବର ପ୍ରଚାରିତ ହେବା ପରେ ବାଉଁଶୁଣି ଅଞ୍ଚଳରେ ଶୋକର ଛାୟା ଖେଳି ଯାଇଛି । ମୃତ ଦେହ ବ୍ୟବଚ୍ଛେଦ ପାଇଁ ବୌଦ୍ଧ ଡାକ୍ତରଖାନାକୁ ପଠାଯାଇଛି ।
