ଭୁବନେଶ୍ୱର: ବାଣୀବିହାର ଆଲୋଚନାଚକ୍ରରେ ଅଶାନ୍ତି ଘଟଣା। ଦୁଇ ଅଣଛାତ୍ରଙ୍କୁ ଗିରଫ କଲା ସହିଦ ନଗର ଥାନା ପୋଲିସ। ଗିରଫ ଅଭିଯୁକ୍ତ ହେଉଛନ୍ତି ମାନସ ସାହୁ ଓ ସଞ୍ଜୟ ମଲ୍ଲିକ। ଘଟଣାରେ ଆଉ ଯେଉଁମାନେ ସଂପୃକ୍ତ ସେମାନଙ୍କୁ ଚିହ୍ନଟ କରାଯାଇ ଦୃଢ କାର୍ଯ୍ୟାନୁଷ୍ଠାନ ନିଆଯିବ ବୋଲି ପୋଲିସ କହିଛି। ଗତକାଲି ଉତ୍କଳ ବିଶ୍ବବିଦ୍ୟାଳୟର ସିଟିଜେନ୍ ଫୋରମ ପକ୍ଷରୁ ପିଜି କାଉନସିଲ ଅଡିଟୋରିୟମରେ “ସମ୍ବିଧାନ ଓ ଶିକ୍ଷା ନୀତି” ଶୀର୍ଷକରେ ଆଲୋଚନାଚକ୍ର ଚାଲିଥିବା ବେଳେ ଗଣ୍ଡଗୋଳ ହୋଇଥିଲା।
ଜେଏନୟୁ ପ୍ରଫେସର ସୁରଜିତ ମଜୁମଦାର ବକ୍ତବ୍ୟ ରଖିବା ସମୟରେ ଏବିଭିପି ଓ ଆରଏସଏସ ସଦସ୍ୟ ଆସି ଗାଳିଗୁଲଜ ଆରମ୍ଭ କରିଥିଲେ। ସେମିନାର ବନ୍ଦ କରିବାକୁ ଧମକ ଦେଇଥିଲେ । ସିଟିଜେନ୍ ଫୋରମ୍ ଆବାହକ ପ୍ରଦୀପ୍ତ ନାୟକ, ଅଧ୍ୟାପକ ସୁରେନ୍ଦ୍ର ଜେନାଙ୍କୁ ଏବିଭିପି ସଦସ୍ୟ ଅଶ୍ରାବ୍ୟ ଭାଷାରେ ଗାଳିଗୁଲଜ କରିବା ସହ ଆକ୍ରମଣ କରିଥିବା ଅଭିଯୋଗ ହୋଇଛି। ଘଟଣା ନେଇ ସହିଦ ନଗର ଥାନାରେ ଉଭୟ ପକ୍ଷରୁ ମାମଲା ଦାଏର କରାଯାଇଥିଲା ।
