ଅଷ୍ଟାଦଶ କାଦମ୍ବିନୀ ସାହିତ୍ୟ ମହୋତ୍ସବ ଓ ତ୍ରୟୋଦଶ ପତ୍ରିକା ହାଟ, ନମିତା ଗୋଖ୍ଲେଙ୍କୁ ନୀଳିମାରାଣୀ ସାହିତ୍ୟ ସମ୍ମାନ
ଭୁବନେଶ୍ୱର,୨ ।୧: ଆମ ସଂସ୍କୃତି ଓ ଅସ୍ଥିତ୍ୱର ପରିଚୟ ହେଉଛି ଶବ୍ଦ ଓ ସାହିତ୍ୟ ବୋଲି ବିଶିଷ୍ଟ ଲେଖିକା ଓ କବି ତଥା ଜୟପୁର ଜାତୀୟ ସାହତ୍ୟ ମହୋତ୍ସବର ସହ-ପ୍ରତିଷ୍ଠାତା ନମିତା ଗୋଖଲେ ପ୍ରକାଶ କରିଛନ୍ତି । ସୋମବାର ଅଷ୍ଟାଦଶ କାଦମ୍ବିନୀ ସାହିତ୍ୟ ମହୋତ୍ସବ ଓ ତ୍ରୟୋଦଶ ପତ୍ରିକା ହାଟ ଅବସରରେ ନୀଳିମାରାଣୀ ସାହିତ୍ୟ ସମ୍ମାନ ଗ୍ରହଣ କରି ଶ୍ରୀମତୀ ଗୋଖଲେ କହିଲେ, ମଣିଷର ଭାବାବେଗ ହେଉଛି ଶବ୍ଦ । ଶଦ୍ଦ ଓ ସାହିତ୍ୟ ମଧ୍ୟରେ ନିବିଡ଼ ସମ୍ପର୍କ ରହିଛି । ସମସ୍ତଙ୍କ ଜୀବନରେ ମାତୃଭାଷାର ଗୁରୁତ୍ୱ ରହିଛି । ତେବେ ଅନ୍ୟ ସବୁ ଭାଷାର ଆଦର ରହିବା ଉଚିତ୍ । ଜ୍ଞାନ ବାଣ୍ଟିଲେ ବଢ଼େ ବୋଲି ସେ କହିଥିଲେ । କାର୍ଯ୍ୟକ୍ରମର ଉଦ୍ଘାଟକ ତଥା ମୁଖ୍ୟ ଅତିଥି ଭାବେ ଯୋଗଦେଇ ବିଶିଷ୍ଟ ଲେଖକ ଓ କେନ୍ଦ୍ର ସାହିତ୍ୟ ଏକାଡେମୀର ଉପସଭାପତି ମାଧବ କୌଶିକ କହିଲେ, ଭାରତୀୟ ସାହିତ୍ୟକୁ ଅନ୍ୟ କେତେକ ଭାଷାର ବହୁ ଯୋଗଦାନ ରହିଛି । ଏ କ୍ଷେତ୍ରରେ ଓଡ଼ିଆ ଭାଷାର ସର୍ବୋଚ୍ଚ ଯୋଗଦାନ ରହିଛି । ଫକୀର ମୋହନ ସେନାପତି ହେଉଛନ୍ତି ଆମ ସାହିତ୍ୟର ସେନାପତି । କାଦମ୍ବିନୀ ପତ୍ରିକାର ପ୍ରୟାସ ପ୍ରଶସଂନୀୟ ବୋଲି ଶ୍ରୀ କୌଶିକ କହିଥିଲେ । ହୃଦୟରୁ ବାହାରୁଥିବା ଶବ୍ଦ ସକାରାତ୍ମକ ବୋଲି ଅନ୍ୟତମ ଅତିଥି ବିଶିଷ୍ଟ ଅଭିନେତା ସଚିନ୍ ପିଲଗାଁଓକର୍ କହିଥିଲେ । ଭାରତୀୟ ସଂସ୍କୃତି ଓ ପରମ୍ପରାକୁ ଜାଣିବାକୁ ହେଲେ ସମସ୍ତେ ଓଡ଼ିଶା ଆସିବା ଉଚିତ୍ ବୋଲି ସେ କହିଥିଲେ । ଆମେ ଯେତେ ଭାଷା ଜାଣିଲେ ମଧ୍ୟ ମାତୃଭାଷାକୁ ଭୁଲିଯିବା ଉଚିତ୍ ନୁ୍ହେଁ । ସାହିତ୍ୟ ଓ ସଂସ୍କୃତି ମାଧ୍ୟମରେ ସଦ୍ଭାବନା ସୃଷ୍ଟି ହୋଇଥାଏ ବୋଲି ବିଶିଷ୍ଟ ମରାଠୀ ଓ ହିନ୍ଦୀ ଚଳଚ୍ଚିତ୍ର ଅଭିନେତ୍ରୀ ସୁପ୍ରିୟା ପିଲଗାଁଓକର୍ କହିଥିଲେ । ମରାଠୀ ସାହିତ୍ୟିକା ଓ ସମାଜସେବୀ ଦୀପା ଦେଶମୁଖ କହିଲେ, ସବୁଭାଷା ଭିତରେ ମାତୃଭାଷାର ସ୍ଥାନ ସବୁଠୁ ଉଚ୍ଚରେ । ବିଜ୍ଞାନ ଆମକୁ ଦୃଷ୍ଟି ଓ ଦୃଷ୍ଟିକୋଣ ଦେଇଥାଏ । କଳା ଓ ସାହିତ୍ୟ ଆମର ଭାବାବେଗକୁ ପରିପ୍ରକାଶ କରିଥାଏ । କାଦମ୍ବିନୀ ସାହିତ୍ୟ ସମ୍ମାନ ଗ୍ରହଣ କରିବା ଅବସରରେ ବିଶିଷ୍ଟ ଲେଖିକା ଓ ଔପନ୍ୟାସିକା ସୁସ୍ମିତା ବାଗ୍ଚୀ କହିଲେ, ମଣିଷର ଭାବାବେଗର ଐତିହାସିକ ହେଉଛନ୍ତି ସାହିତ୍ୟିକ । ମଣିଷର ଭାବାବେଗକୁ ସାହିତ୍ୟିକ ରୂପ ଦେଇଥାଏ । କାର୍ଯ୍ୟକ୍ରମରେ ସ୍ୱାଗତ ଭାଷଣ ପ୍ରଦାନ କରି କାଦମ୍ବିନୀର ପ୍ରତିଷ୍ଠାତା ତଥା କନ୍ଧମାଳ ସାଂସଦ ଅଚ୍ୟୁତ ସାମନ୍ତ କହିଲେ, ପତ୍ରିକାଟିଏ କରିବା ଓ ତାକୁ ବଞ୍ଚାଇ ରଖିବା କଷ୍ଟକର ବ୍ୟାପାର ଏବଂ ଏକ ଫିଚର ପତ୍ରିକା ପ୍ରକାଶ କରିବା ଆହୁରି କଷ୍ଟକର । ତେବେ ଗତ ୨୩ ବର୍ଷ ଧରି କାଦମ୍ବିନୀ ନିୟମିତ ଭାବେ ପ୍ରକାଶ ପାଇବା ସହ ଲୋକଙ୍କ ପ୍ରିୟଭାଜନ ହୋଇପାରିଥିବାରୁ ସେ କାଦମ୍ବିନୀର ସମ୍ପାଦିକା ଇତି ସାମନ୍ତ ଓ କାଦମ୍ବିନୀ ପରିବାରକୁ ଧନ୍ୟବାଦ ଜଣାଇଥିଲେ । ବିଭିନ୍ନ କାରଣ ବିଶେଷକରି ଆର୍ଥିକ ଅସୁବିଧାରୁ ଅନେକ ଓଡ଼ିଆ ପତ୍ରିକା ବନ୍ଦ ହୋଇଯାଉଛି । ଏହି ପରିପେକ୍ଷୀରେ କାଦମ୍ବିନୀ ପ୍ରକାଶନ ମାଧ୍ୟମରେ ଏଭଳି ୨୦ରୁ ୨୫ଟି ଦୁସ୍ଥ ପତ୍ରିକାକୁ ପ୍ରୋତ୍ସାହନ ଯୋଗାଇ ଦିଆଯିବ ବୋଲି ଶ୍ରୀ ସାମନ୍ତ ଘୋଷଣା କରିଥିଲେ ।
ଏହି ଅବସରରେ କାଦମ୍ବିନୀ ସାହିତ୍ୟ ଏକାଡ଼େମୀ ପକ୍ଷରୁ ବିଶିଷ୍ଟ ଲେଖିକା ତଥା ଜୟପୁର ଲିଟେରାରୀ ଫେଷ୍ଟିଭାଲର ସହ-ପ୍ରତିଷ୍ଠାତା ଓ ସହ-ନିର୍ଦ୍ଦେଶକ ନମିତା ଗୋଖ୍ଲେଙ୍କୁ ସମ୍ମାନଜନକ ଜାତୀୟସ୍ତରୀୟ ‘ନୀଳିମାରାଣୀ ସାହିତ୍ୟ ସମ୍ମାନ-୨୦୨୩’ ପ୍ରଦାନ କରାଯାଇଥିଲା । ପୁରସ୍କାର ସ୍ୱରୂପ ଶ୍ରୀମତୀ ଗୋଖ୍ଲେଙ୍କୁ ୫ଲକ୍ଷ ଟଙ୍କାର ଅର୍ଥରାଶି, ରୌପ୍ୟ ପଦକ, ସନନ୍ଦ ପତ୍ର ଓ ଉପଢ଼ୌକନ ପ୍ରଦାନ କରାଯାଇଥିଲା । ସୁସ୍ମିତା ବାଗ୍ଚୀଙ୍କୁ ‘କାଦମ୍ବିନୀ ସାହିତ୍ୟ ସମ୍ମାନ-୨୦୨୩’ ପ୍ରଦାନ କରାଯାଇଥିôବା ବେଳେ ଶ୍ରୀମତୀ ବାଗ୍ଚୀଙ୍କୁ ୧ଲକ୍ଷ ଟଙ୍କାର ଅର୍ଥରାଶି, ସନନ୍ଦ ପତ୍ର ଓ ଉପଢ଼ୌକନ ପ୍ରଦାନ କରାଯାଇଥିଲା । ‘ପକ୍ଷୀଘର’ର ସମ୍ପାଦକ ବନୋଜ ତ୍ରିପାଠୀଙ୍କୁ ‘କାଦମ୍ବିନୀ ସମ୍ପାଦକ ସମ୍ମାନ-୨୦୨୩’ ପ୍ରଦାନ କରାଯାଇଥିବା ବେଳେ ବରିଷ୍ଠ ସାହିତ୍ୟିକ ଗଣେଶରାମ ନାହାକ, ରବୀନ୍ଦ୍ରନାଥ ମିଶ୍ର ଓ କେଶବ ଚନ୍ଦ୍ର ରାଉତରାୟଙ୍କୁ ‘କାଦମ୍ବିନୀ ସାହିତ୍ୟ ସମ୍ବର୍ଦ୍ଧନା-୨୦୨୩’ରେ ସମ୍ବର୍ଦ୍ଧିତ କରାଯାଇଥିଲା । ‘କାଦମ୍ବିନୀ ସମ୍ପାଦକ ସମ୍ମାନ’ ସ୍ୱରୂପ ଶ୍ରୀ ତ୍ରିପାଠୀଙ୍କୁ ୧୦ହଜର ଟଙ୍କାର ଅର୍ଥ ରାଶି, ଏବଂ ‘କାଦମ୍ବିନୀ ସାହିତ୍ୟ ସମ୍ବର୍ଦ୍ଧନା-୨୦୨୩’ ସ୍ୱରୂପ ଶ୍ରୀ ନାହାକ, ଶ୍ରୀ ମିଶ୍ର ଓ ଶ୍ରୀ ରାଉତରାୟଙ୍କୁ ୫ହଜାର ଟଙ୍କାର ଅର୍ଥରାଶି ପ୍ରଦାନ କରାଯାଇଥିଲା । ଏହି ଅବସରରେ ଅତିଥିମାନଙ୍କ ଦ୍ୱାରା କାଦମ୍ବିନୀ ଓ କୁନିକଥା ଜାନୁଆରୀ ସଂଖ୍ୟା ଉନ୍ମୋଚନ ହୋଇଥିଲା । କାଦମ୍ବିନୀ ଜାନୁଆରୀ ସଂଖ୍ୟା ମରାଠୀ ଅନୁବାଦ ବିଶେଷାଙ୍କ ଭାବେ ପ୍ରକାଶ ପାଇଛି । ଡ. ଇତି ସାମନ୍ତଙ୍କ ଉପନ୍ୟାସ ‘ଶକୁନ୍ତଳାର ଝିଅ’ର ହିନ୍ଦୀ ଅନୁବାଦ ‘ଶକୁନ୍ତଳା କି ବେଟୀ’ ଅତିଥିମାନଙ୍କ ଦ୍ୱାରା ଉନ୍ମୋଚିତ ହୋଇଥିଲା ଏବଂ ଏହି ଉପନ୍ୟାସ ସମ୍ପର୍କରେ ଆଲୋକପାତ କରିଥିଲେ ବିଶିଷ୍ଟ ଭାଷାବିତ୍ ଦେବାଶିଷ ମହାପାତ୍ର । ଏହି ଅବସରରେ ‘ଶକୁନ୍ତଳା କି ବେଟୀ’ର ପ୍ରକାଶକ ଦିଲ୍ଲୀ ମେଧାବୁକ୍ସର ଅଧିକାରୀ ଅଜୟ କୁମାର ଏବଂ ଅନୁବାଦକ ଶଙ୍କରଲାଲ୍ ପୁରୋହିତ ଉପସ୍ଥିତ ଥିଲେ ।
