ବୌଦ୍ଧ: ଆଜି ଦିନ ପ୍ରାୟ ୧୨ ଘଣ୍ଟା ସମୟରେ ବୌଦ୍ଧ ସହର ଉପକଣ୍ଠ ଟୁଟୁସିଙ୍ଗା ଅଂଚଳରେ କୁଅରୁ ପଙ୍କ ଉଦ୍ଧାର କରିବା ପାଇଁ ପଶିଥିବା ବେଳେ ଦୁଇଜଣଙ୍କ ମୃତ୍ୟୁ ହୋଇଛି ଓ ଜଣେ ଆହତ ହୋଇଛନ୍ତି । ମିଳିଥିବା ସୂଚନା ଅନୁଯାୟୀ ବୌଦ୍ଧ ସହର ନିକଟବର୍ତ୍ତୀ ଟୁଟୁସିଙ୍ଗା ମୌଜା ଜାତୀୟ ରାଜପଥ କାର୍ଯ୍ୟାଳୟ ପଛପାଖରେ ବ୍ରଜମୋହନ ବିଶିଙ୍କ କୁଅ ପଙ୍କୋଦ୍ଧାର ପାଇଁ କୁଅ ଭିତରେ ପଶିଥିବା ବେଳେ ଶ୍ୱାସରୁଦ୍ଧ ହୋଇ ୩ଜଣ ଶ୍ରମିକ ଅମ୍ଳଜାନ ଅଭାବରୁ ଅଚେତ ହୋଇ ପଡିଥିଲେ । ଖବର ପାଇ ବୌଦ୍ଧ ଦମକଳ ବାହିନୀ ସେମାନଙ୍କୁ ଉଦ୍ଧାର କରି ବୌଦ୍ଧ ଜିଲ୍ଲା ମୁଖ୍ୟ ଚିକିତ୍ସାଳୟକୁ ଆଣିଥିଲେ । ନିରଞ୍ଜନ ଭୋଇ(୩୫) ଓ ପ୍ରଫୁଲ୍ଲ ସାହୁ(୩୮)ଙ୍କୁ ଡାକ୍ତର ମୃତ ଘୋଷଣା କରିଥିବାବେଳେ ପପୁ ବେହେରା(୨୮) ସାମାନ୍ୟ ଅସୁସ୍ଥ ଥିଲେ ମଧ୍ୟ ତାଙ୍କର ଜୀବନ ପ୍ରତି କୌଣସି ବିପଦ ନଥିବା ଜଣାପଡିଛି । ସମସ୍ତେ ରଙ୍ଗମିସ୍ତ୍ରୀ ଅଟନ୍ତି ଓ ବ୍ରଜ ବିଶିଙ୍କ ଘରେ ରଙ୍ଗ ଲଗାଉଥିଲେ । କୁଅକୁ ଟିକିଏ ସଫା କରିଦେବା ପାଇଁ ବ୍ରଜ ବିଶିଙ୍କ ଅନୁରୋଧ କ୍ରମେ ସେମାନେ ଆଜି ଦିନ ପ୍ରାୟ ୧୨ ଘଣ୍ଟା ସମୟରେ କୁଅକୁ ପଶିଥିବା ବେଳେ ଏଭଳି ଅଘଟଣ ଘଟିଥିଲା ।
