ବୌଦ୍ଧ : ବୌଦ୍ଧ ବ୍ଲକ୍ ଖୁଣ୍ଟବନ୍ଧ ଗ୍ରାମ ପଂଚାୟତର ବ୍ରହ୍ମଚାରି ଗ୍ରାମରେ ୩ ଗୋଟି ଗରୀବ ପରିବାର କେନ୍ଦ୍ର ସରକାରଙ୍କ ସୌଭାଗ୍ୟ ଯୋଜନାରୁ ବଞ୍ଚିତ ହୋଇଥିବା ଜଣାପଡିଛି । ସେମାନେ ସାଉଥ କୋ ନିର୍ବାହୀ ଯନ୍ତ୍ରୀଙ୍କୁ ଭେଟି ନିଜର ଅଭିଯୋଗ ଦେଇଛନ୍ତି । ଅଭିଯୋଗ ଅନୁଯାୟୀ ବ୍ରହ୍ମଚାରୀ ଗ୍ରାମର ରାଜେନ୍ଦ୍ର ପାଣ୍ଡେ, ରଂଜନ ସେଠୀ ଓ ଶ୍ୟାମ ମିର୍ଦ୍ଧା ସୌଭାଗ୍ୟ ଯୋଜନାରେ ଘରକୁ ମାଗଣା ବିଦ୍ୟୁତ୍ ସଂଯୋଗ ନେବା ପାଇଁ ସଂଯୋଗ ଦେଉଥିବା ଠିକା ସଂସ୍ଥା କୁ ଦରଖାସ୍ତ ବର୍ଷେ ତଳେ ଦେଇଥିଲେ । ତାଂକର ଗ୍ରାମରେ ୯୩ ପରିବାରକୁ ସୌଭାଗ୍ୟ ଯୋଜନାରେ ବିଦ୍ୟୁତ୍ ସଂଯୋଗ ଠିକା ସଂସ୍ଥା ଦେଇଥିଲେ ମଧ୍ୟ ୩ ଗୋଟି ପରିବାରକୁ ଅଣଦେଖା କରିଥିବା ଅଭିଯୋଗ କରିଛନ୍ତି । ଏ ସମ୍ପର୍କରେ ତଦନ୍ତ କରି ଖୁବ୍ ଶୀଘ୍ର ବିଦ୍ୟୁତ୍ ସଂଯୋଗ ଦିଆଯିବ ବୋଲି ନିର୍ବାହୀ ଯନ୍ତ୍ରୀ ପ୍ରତିଶ୍ରୁତି ଦେଇଥିବା ସୂଚନା ମିଳିଛି ।
