ପୁରୀ : ପୁରୀରେ ଦିନକୁ ଦିନ ବାଇକ ଲୁଟେରା ଗ୍ୟାଙ୍ଗ ସକ୍ରୀୟ ହେଉଥିବା ବେଳେ ଏମାନଙ୍କୁ ଗିରଫ କରିବାରେ ସଫଳ ହୋଇଛି ପୁରୀ ପୋଲିସ । ଗତକାଲି ତିନିଜଣିଆ ବାଇକ ଲୁଟେରା ଗ୍ୟାଙ୍ଗକୁ ବଳିଆପଣ୍ଡା ଥାନା ପୋଲିସ ଗିରଫ କରିବା ସହ ସେମାନଙ୍କୁ କୋର୍ଟ ଚାଲାଣ କରିଛି । ଗିରଫ ଅଭିଯୁକ୍ତ ହେଲେ ବ୍ରହ୍ମଗିରି ହସିମପୁର ଅଞ୍ଚଳର ରାଜେଶ କୁମାର ପ୍ରଧାନ, ବଳିଆପଣ୍ଡାର ଶୁଭେନ୍ଦୁ କରମକାର ଓ ଗୋପିନାଥପୁରର ଦଇତାରୀ ବେହେରା । ଏମାନଙ୍କ ଠାରୁ ୫ଟି ଚୋରା ବାଇକ, ତିନୋଟି ଦାମି ମୋବାଇଲ, ୩ ହଜାର ଶହେ ଟଙ୍କା ସହ ଅଭିଯୁକ୍ତ ମାନେ ବ୍ୟବହାର କରୁଥିବା ଏକ ମୋପେଡ ଗାଡି ପୋଲିସ ଜବତ କରିଛି । ଗତ ୮ ତାରିଖ ଦିନ ପୁରୀ ଗୌଡବାଡ ସାହି ଅଞ୍ଚଳର ଶେଷ ବେହେରା ଷ୍ଟର୍ଲିଂ ରିସର୍ଟ ଠାରେ ନିଜ ବାଇକ ରଖି ସମୁଦ୍ରକୁ ମାଛ ମାରିବା ପାଇଁ ଯାଇଥିଲେ । ତେବେ ମାଛ ମାରି ଫେରିବା ପରେ ଉକ୍ତ ଅଞ୍ଚଳରେ ତାଙ୍କ ବାଇକ ନଥିବା ଦେଖିବାକୁ ପାଇଥିଲେ । ଏନେଇ ଗତ ୧୧ ତାରିଖରେ ବଳିଆପଣ୍ଡା ଥାନାରେ ଶେଷ ବେହେରା ଲିଖିତ ଅଭିଯୋଗ କରିଥିବା ବେଳେ ଗତକାଲି ପୋଲିସ ଏହି ଲୁଟେରା ଗ୍ୟାଙ୍ଗକୁ ଧରିବାରେ ସଫଳ ହୋଇଥିଲା । ତେବେ ଅଭିଯୁକ୍ତ ମାନେ ପୁରୀ, ଭୁବନେଶ୍ୱର ଓ କଟକରେ ଏହି ଚୋରା ବାଇକ ବିକ୍ରୀ କରୁଥିବା ବେଳେ ଖୁବଶୀଘ୍ର ଗ୍ୟାଙ୍ଗର ମାଷ୍ଟର ମାଇଣ୍ଡ ଧରାପଡିବ ବୋଲି ଏକ ପ୍ରେସ ବିଜ୍ଞପ୍ତି ମାଧ୍ୟମରେ ପୁରୀ ବଳିଆପଣ୍ଡା ଥାନା ପୋଲିସ ସୂଚନା ଦେଇଛି ।
