ନବରଙ୍ଗପୁର: ନବରଙ୍ଗପୁର ସତ୍ୟ ସାଇ ସେବା ସଂଗଠନ ପକ୍ଷରୁ ଇଚ୍ଛାବତୀ ଗୁଡା ସତ୍ୟ ସାଇ ମନ୍ଦିର ପରିସରରେ ଏକ ରକ୍ତଦାନ ଶିବିର ଅନୁଷ୍ଠିତ ହୋଇଯାଇଛି । ଶ୍ରୀ ସତ୍ୟସାଇ ବାବାଙ୍କ ୯୬ତମ ଜନ୍ମ ଜୟନ୍ତୀ ପାଳନ ଅବସରରେ ଆୟୋଜିତ ରକ୍ତଦାନ ଶିବିରରେ ସହରର ଅନେକ ରକ୍ତଦାତା ସେଚ୍ଛାକୃତ ଭାବେ ରକ୍ତଦାନ କରିଥିଲେ । ମୁଖ୍ୟ ଅତିଥି ଭାବେ ଜିଲ୍ଲାପାଳ କମଳ ଲୋଚନ ମିଶ୍ର ଯୋଗ ଦେଇ ଦୀପ ପ୍ରଜ୍ଜ୍ୱଳନ କରି ଉଦଘାଟନ କରିବା ସହ ସ୍ୱୟଂ ନିଜେ ରକ୍ତଦାନ କରି ଉଦାହରଣ ସୃଷ୍ଟି କରିବା ସହ ଅନ୍ୟମାନଙ୍କ ପାଇଁ ପ୍ରେରଣା ଯୋଗାଇଛନ୍ତି । ଅନ୍ୟତମ ସମ୍ମାନୀତ ଅତିଥି ଭାବେ ସିଡିଏମଓ ଶ୍ରୀମତି ସୋଭରାଣୀ ମିଶ୍ର ଯୋଗ ଦେଇଥିଲେ । ଏହି ଶିବିରରେ ମୋଟ ୨୬ ୟୁନିଟ ରକ୍ତ ସଂଗ୍ରହ ହୋଇଥିବା ବେଳେ ଅନୁରୂପ ଭାବେ ରାଇଘର ଠାରେ ମଧ୍ୟ ରକ୍ତଦାନ ଶିବିର ଆୟୋଜନ କରାଯାଇଥିଲା ।
ରାଇଘର ରକ୍ତଦାନ ଶିବିରରେ ମୋଟ ୬୫ ୟୁନିଟ ରକ୍ତ ସଂଗ୍ରହ କରାଯାଇଥିବା ସୂଚନା ମିଳିଛି । ଆଜିର ଦିନରେ ଭାରତର ବିଭିନ୍ନ ସ୍ଥାନରେ ସତ୍ୟ ସାଇ ସେବା ସଂଗଠନ ଦ୍ୱାରା ରକ୍ତଦାନ ଶିବିର ମାନ ଆୟୋଜନ କରାଯାଇ ଶ୍ରୀ ସତ୍ୟସାଇ ବାବାଙ୍କ ଜନ୍ମଦିନର ଅବ୍ୟବହିତ ପୂର୍ବର ଉତ୍ସବ ପାଳନ କରାଯାଇଛି । ଏହି କାର୍ଯ୍ୟକ୍ରମକୁ ଶ୍ରୀ ସତ୍ୟସାଇ ସେବାସଂଘ ସଭାପତି ପି ଲିଙ୍ଗାମୂର୍ତ୍ତି, ପୂର୍ବତନ ସିଡ଼ିଏମଓ ଡଃ ନନ୍ଦ, ଡ଼ାଃ.ପ୍ରଭାକର ଦାସ, କୈଳାସ ଚନ୍ଦ୍ର ବେହେରା,ଡଃ. ହରି ପ୍ରସାଦ ତୁଳ, ପରଦେଶୀ ପୂଜାରୀ, ଟଙ୍କ ଯାନୀ ପ୍ରମୁଖ ଉପସ୍ଥିତ ଥିଲେ ।
